[sgmb id="1"] Аймгийн Засаг даргын энэ долоо хоногийн шуурхайг удирдсан аймгийн Засаг даргын орлогч А.Түвшинжаргал Цагаанчулуут багийн нутаг дэвсгэр, 7А хороолын шороон зам тойрсон асуудлыг шийдэх талаар санал дэвшүүллээ. Тэрбээр сүүлийн үед цахим ертөнцөд “Эрдэнэтийн цагаан тоосноос гадна эрх баригчид Цагаанчулуутын цагаан тоосыг бий болголоо” хэмээн иргэдийн шүүмжийн хариуд “Энэ замыг бүр хаачихвал яасан юм бэ. Нээхгүй байж болох уу” хэмээн асуудлыг шийдэх горимын санал гаргав. Хот байгуулалт, барилга захиалагчийн албаны дарга Д.Мөнхдалай “Иргэдийн хүсэлтээр замыг нээсэн. Мөн зам дагуу бизнесийн үйл ажиллагаа эрхэлдэг газраас ч замын хөдөлгөөнийг нээх тухай санал гаргаж байгаа. Дээр нь замын хажуугийн гэрэл байхгүй болсон зэрэг хүндрэл бий” хэмээн тайлбарлав. “Гээндээ ч бий гоондоо ч бий” гэдэгчлэн Цагаанчулуут багийн нутаг дэвсгэр дэх замын ажил нь гүйцэтгэгч тал “Их хаадын цуваа” компани, орон нутгийн удирдлагуудын хоорондын ажлын уялдаа холбоо, зохион байгуулалт муугаас ийм байдалд хүрсэн. Зам дагуух айлуудын хувьд ч гэлтгүй “Евро эко” хорооллын оршин суугчид ч замын шороонд дарагдаж халтар царайлж, хамаг юм нь шороонд дарагдаж байгаа. Нөгөө талдаа зам хааснаар асуудлыг шийдэхгүй л болов уу. Хотын төв рүү орохын тулд хорооллын гудамж сүлжих, нарийн замд түгжрэл үүсгэх нь өвлийн цагт шийддэг гарц, арга зам мөн үү гэдгийг хаа хаанаа бодолцох нь зөв болов уу.