[sgmb id="1"]           Жаргалант сумын Сум хөгжүүлэх сангаас 2012-2016 оны эхний хагас жилд олгогдсон зээлийн эргэн төлөлт асуудалтай байгаа талаар Засаг дарга Г.Зоригтбаяр мэдээлж байсан. Тус сумын хэмжээнд Сум хөгжүүлэх сангийн зээлийн эргэн төлөлт асуудалтай байгаа учраас сангийн үйл ажиллагаа нь доголдож түүний хэрээр иргэдэд очих ёстой хөнгөлөлттэй зээл олгогдохоо больсон. Жаргалант сумын зүгээс энэ хавар зээл төлүүлэх, хугацаа хэтрүүлсэн зээлдэгчтэй уулзах чиглэлээр, хүү торгуулиас чөлөөлөх зорилгоор “Зээл төлүүлэх аян” зохион байгуулах зэрэг багагүй ажил хийсэн байдаг. Зээлээ төлж байгаа иргэдийн нөхцөл боломжийг судлаад гэрээний хугацааг сунгах чиглэлээр зээлдэгчдэд хандсан ажил хийжээ. Өнөөдрийн байдлаар тус сумын Сум хөгжүүлэх сангийн шугамаар олгосон 270 сая шахам төгрөгөөс 85 сая төгрөгийг эргүүлэн төлүүлээд байгаа аж. Мөн сумын өмнөх удирдлагын шийдвэрээр шууд олгосон 18 зээлийг цагдаагийн байгууллагад шилжүүлж, прокурорын хяналтанд хэрэг бүртгэл үүсээд байгаа. Мөн 22 зээлдэгчийн асуудлыг шүүхээр шийдвэрлүүлэхээр болжээ. Сум хөгжүүлэх сангийн зээлийн журмаар бол нийт олгогдсон зээлийн 40 хувь нь эргэн төлөгдсөн бол дараагийн зээлийг олгодог байна. Эргэн төлөлтөөс орж ирсэн 85 сая төгрөгийг энэ удаад иргэн, аж ахуйн нэгжид хүнсний ногооны зоорины чиглэлээр олгох гэнэ. Тус сумын иргэн, аж ахуйн нэгжээс зээл хүссэн 72 өргөдөл иржээ. Сангийн зээлийг иргэдэд 8, аж ахуйн нэгж, хоршоонд 12 сая төгрөг олгодог аж.