Хот тохижуулах газрын Үйлдвэрчний хорооноос ийм нэртэй хэвлэлийн бага хурал хийлээ. Сүүлийн үед цахим орчинд үнэхээр л Хот тохижуулах газрынхан болон энэ байгууллагын дарга ажлаа хийхгүй байгаа мэтээр шуугих болсон. Бүр сүүлдээ энэ байгууллагын даргыг өөрчлөх, солих талаар Амарын талбайд жагсаал, цуглаан зохион байгуулах тухай ч дуулдсан. Тэгвэл Хот тохижуулах газрын ажилчид “Бид улстөржмөөргүй байна, Ажлаа тайван хиймээр байна. Цахим орчинд ярих, бодитоор ажиллах 2 чинь өөр шүү, Бид ажилласаар л байна” хэмээн хэвлэлийнхэнээр дамжуулан олон нийтэд дуу хоолойгоо хүргэлээ.

Энэ өвлийн хувьд Хот тохижуулахын ажилтан гэлтгүй эрдэнэтчүүдэд хүнд байгаа. Цочир хүйтрэл, хоёр өдөр шахам үргэлжлэн орсон цас, өдөртөө хасах 25 хэм хүрсэн нь бидний амьдралын тав тухыг бараг л орвонгоор нь эргүүлсэнгүй. Халтиргаа гулгаа, цас мөсний цэвэрлэгээ, явган хүний зам бүгд тэр чигтээ та бидний амьдралд сэдэв болон орж ирсэн. Бидний ярих, бичих, өгүүлэл тавих сэдэв нэмэгдсэн ч Хот тохижуулахын ажилчид ажлаа хийж байгаа, хийсээр ч байх болно. Харин биднийг тэрхүү улстөржилт, улс төрийн тэмцэлдээ бүү татан оролцуул хэмээн Хот тохижууллах газрын ажилчид сануулж байна. Тус байгууллагын үйлдвэрчний хорооны дарга Д.Эрдэнэбат

“Хэрвээ та бүхэн бидний ажлыг хийлгэхгүй, биднийг улс төрийн бохир тоглоомондоо татан оролцуулах гээд байвал манайхан Амарын талбайд хүрзээ бариад, хогны машинаа унаад ажил хаялт зохион байгуулна. Та нарын цахим улс төрийн тэрхүү үймээнээс болж манай ажилчдын сэтгэл санаа хүнд байна. Өглөө ажилдаа яваад орой гэртээ ирэхэд нь гэр бүлийнхэн нь та нар ажлаа хийж байгаа юм уу. Цахим орчинд та нарыг ажлаа хийхгүй байна гэж шуугих боллоо гэж хэлж байна. Энэ бүхэн арай дэндлээ” хэмээн мэдэгдлээ.