Аймгийн Засаг даргын энэ сарын 8-ны шуурхай зөвлөгөөн болов. Шуурхайг Засаг дарга С.Батжаргал удирдан явууллаа.  Өмнөх буюу арваннэгдүгээр сарын 1-ний шуурхайгаас аймгийн Засаг даргын орлогч М.Түмэнжаргал “Сэлэнгэ голын сав газрын захиргааг Говил руу нүүлгэ” гэсэн үүрэг даалгавар өгсөн. Дээр нь энэ чиглэлээр йамгийн засаг даргын захирамж ч гарчээ.

Гэтэл Сэлэнгэ голын сав газрын захиргааны дарга С.Чулуунзагд “ Говил руу нүүх боломжгүй. Манай  ажилчид дургүй байна. Нүүвэл Эрдэнэ багийн байр руу нүүе л дээ. Намайг ийм саналтай байна гэж цаадахдаа хэлээд өг” хэмээн сумын Засаг дарга Б.Баасансүрэнд үг дайжээ. Б.Баасансүрэн дарга өнөөдрийн шуурхай дээр С.Чулуунзагдын хүсэлтийг уламжилсан юм.

Харин аймгийн Засаг даргын хувьд “Төр нэг гараараа багийн хөгжлийн төв барих хөрөнгө гаргаад нөгөө гараараа төрийн байгууллагыг хувийн хэвшилд өндөр үнэтэй байр түрээслэхэд нь мөнгө төлөөд байж таарахгүй. Багийн хөгжлийн төвүүдийн барилгын багтаамж, ашиглалтыг  дээшлүүлэхэд анхаарна. Говил баг юун хол байгаам. Иргэд, эрдэнэтчүүд, Говил багийнхан явж болоод л байна. Танай байгууллагынхан яагаад явж болохгүй гэж. Тийм юм байхгүй. Чулуунзагд аа, өгсөн үүрэг даалгаврыг биелүүлээд яв. Таньд сонголт хийлгэх боломж ч байхгүй. Эрдэнэ баг руу бол явах уу, Говил бол хол байна уу  гэж асуугаагүй” хэмээн хатуухан сануулав.

Орхон аймгийн нутаг дэвсгэр дээр аймгийн Засаг даргын захирамж, үүрэг даалгаврыг биелүүлэх нь төрийн албан хаагчдын хувьд бол хуулиар хүлээсэн үүрэг. Гэтэл С.Чулуунзагд дарга аймгийн Засаг даргын өөдөөс дуугарч, сонголт энэ тэр ярьж байгаа нь босоо удирдлагатай байгууллагын дарга гээд томорч байна уу аль эсвэл ардаа их том хүнтэй гээд сүүлээ өргөж сууна уу.