Бидэнд захидал ирлээ “МЕДИПАС”-ын маапаантай үйлчилгээ              Манай сайтын зүгээс уншигчдынхаа захидлыг хүлээн авч тэдний санал хүсэлт, дуу хоолойг аймаг, орон нутгийн удирдлагуудад хүргэх, Эрдэнэт хотынхоо хөгжлийн төлөө, Орхон аймгийн хэтийн төлөвийн төлөө санаа зовж явдаг эрхмүүдийн дуу хоолойг хүргэхийн тулд “Бидэнд захидал ирлээ” булан ажиллуулж байна. Манай буланд ирсэн Баян-Өндөр сумын Зэст багийн иргэн Г.Баярын захидлыг бүрэн эхээр нь хүргэж байна. Түүний хувьд “Медипасын маапаантай үйлчилгээ” гарчигтай захидлыг бидэнд ирүүлсэн юм.                      “Эрдэнэт үйлдвэрийн тухайн үеийн удирдлага аймаг, хотынхоо төдийгүй бүс нутгийн хэмжээнд ард иргэддээ үйлчлэх орчин үеийн дэвшилтэт техникээр тоноглогдсон эмнэлгийг байгуулъя хэмээн санаа сэдэн хөөцөлдөж ажил болсон нь саяхан. Эрдэнэтчүүд төдийгүй ойр аймаг нутгийнхан их баярлаж, “Хот орохгүйгээр оношлогоо хийлгэн эмчлүүлэх боломжтой боллоо” хэмээн энэ эмнэлгийг  үнэ өртөг харгалзахгүйгээр зорин ирэх болсон билээ. Уг эмнэлэг ч орчин үеийн өндөр өртөгтэй тоног төхөөрөмж Японоос авчран суурилуулж менежментийн хувьчлалын гэрээг үйлдвэртэй байгуулан ажиллаж байна. Сайхан эмнэлэг байгуулагдаж иргэдэд үйлчлэх болсонд “Эрдэнэт” үйлдвэрт талархахаас өөр аргагүй. Гэтэл сайны хажуугаар саар гэгчээр эмнэлгийн тангараг өргөсөн эмч нарын зан араншин, ёс зүй, үйлчилгээний соёл доголдож байгаа талаар захидал бичихээс өөр аргагүй боллоо. Энэ эмнэлгийн талаар “Сүүлийн үеийн хүчтэй тоног төхөөрөмжтэй ч оношлогоо сайн. Харин мэргэжлийн эмчилгээ дутмаг” гэсэн нийтлэг нэг яриа явж байгааг үгүйсгэхэд хэцүү. Хэдийгээр явган яриа гэх боловч, хотоос ирсэн өндөр хангамжтай эмч нар тэр хэмжээндээ хүрч ажиллаж чадаж байна уу гэдэг бол анхаарал татах асуудал болжээ.       Эмнэлгийн үйлчилгээний гол нь цаг барих явдал. Нэгэнт үзүүлэх цагаа захиалчихаад тэндээ тааруулж ажлаа зохицуулсан хүмүүс зөндөө л ирдэг байх. Гэтэл цагаа барихын оронд “давхар ажилтай” хэмээн үйлчлүүлэгчдээ чирэгдүүлдэг эмч байна. Нийслэлээс ирж, чемодан дээр сууж орон нутагт “томорсон” эмч нар цаг барих гэдгийг өөрийн сайн дурын ажил гэж үздэг бололтой. Саяхан миний бие Хоол боловсруулах эрхтэний эмгэг судлал /Гастро-эндрологи буюу дурангийн/-ын тасгийн эрхлэгч Т.Цэрэнтогтох эмч “Би ядарсан хүн үздэг”, /Хүмүүсийг ядарсан, ядраагүй гэж энэ эмч ялгадаг бололтой. Ядраагүй хүн урдчилан сэргийлэх зорилгоор эмчид очих ёсгүй  юм байж/.  “Үзлэгийн цаг хамаагүй. Хүлээж чадахгүй бол төлбөрөө буцаа” хэмээн энэ эмнэлэгт хандсан иргэнд агсарч байна. Цагаа баримтлах шаардлага тавьсан үйлчлүүлэгч намайг арай л барьж аваад заамдсангүй.  Үзлэгийн цаг болчихоод байхад Т.Цэрэнтогтох эмч үйлчлүүлэгчээ үл тоон, ажлын өрөөндөө бус хонгилд зогсон “элэгний вирус тоолсон тухайгаа, дурангийн хагалгаанд намайг дуудсан гэхдээ хагалгаандаа ороогүй, өөр эмч хагалгааг нь хийж байгаа” хэмээн өөрийгөө өргөмжилж, цаг авсан  үйлчлүүлэгчтэй үг сөрж, биеэ өмөөрөн “Явдаг газраараа яв” хэмээн маш их ёс зүйгүй аашилсан юм. Над руу ингэж аашилсан хугацаа нь намайг оролцуулаад хоёр ч хүн үзчих хэмжээний цаг болсон. Үнэндээ Т.Цэрэнтогтох гэгч эмч үндсэн ажлаасаа гадуур “элэг хамгаалах зорилготой” гэх олон нийтийн байгууллагын  нэрээр аймгийн ЗДТГ-аас мөнгө хөрөнгө гаргуулан, түүнийгээ ажлынхаа цагаар /ядахдаа үндсэн ажлынхаа хүрээнд үзлэгээ хийчихээд дараа нь хийж болох байлгүй/ амжуулж байсан нь энэ юмсанж. Аймгийн Засаг дарга Д.Батлут “Гэрээт  ажлаа хийхдээ үндсэн ажлынхаа хажуугаар иргэдийн үйлчилгээтэй зэрэгцэн амжуулаарай” гэж арай л гэрээ байгуулаагүй баймаар юм. “Медиапас”  эмнэлгийн хамт олны нэр хүндийг Т.Цэрэнтогтох мэт өөрийгөө дөвийлгөсөн, авхаалжтай “ажилладаг”, ажил үүргээ зохицуулахын оронд үйлчлүүлэгч рүүгээ дайрч давшлан, үндсэн ажилтайгаа зэрэгцүүлэн  “давхар” ажил амжуулж явдаг иймэрхүү эмч нар унагаж байгаа нь харамсалтай. Энэ эмнэлэг дээр хүний нөөцийн бодлого ямар байдалтай байгааг энэ жишээ харуулж байна. Эрдэнэтчүүд ч энэ талаар ярих цаг болжээ.      Эмчийнхээ мэргэжлийн ёс зүйг орхигдуулсан эмчийг алдаагаа ухаарч, дахин ийм зүйл битгий гаргаасай, залуу хүн сургамж аваасай, эмнэлгийн захиргаа иймэрхүү байдалд дүгнэлт хийж, хүний нөөцийн бодлогоо сайжруулаасай, ард иргэдээ хүнд сурталгүй, шуурхай, сэтгэл гаргаж үйлчилж байгаасай гэсэн энгийн иргэний хүсэл юм шүү хэмээн захидал илгээсэн юм.    Та бүхнийг хүндэтгэсэн Г.Баяр