Монгол Улс, БНЧУ-ын Засгийн газар хоорондын гэрээний дагуу манай аймагт “Евро эко төгөл” төслийг амжилттай хэрэгжүүлж байна. Уг төслийн хүрээнд “Их хаадын цуваа” ХХК Цагаанчулуут багийн нутаг дэвсгэр дээр 2000 айлын орон сууцны барилга бүхий хорооллыг бүтээн байгуулж байгаа. Хоёр улсын гэрээний дагуу Орхон аймаг 11 га газраа үнэ төлбөргүй өгч, дэд бүтэц, инженерийн шугам сүлжээнд улсын төсвөөс хөрөнгө оруулалт хийсэн. Дээрх төслийн явцыг газар дээр нь үзэхээр БНЧУ-аас Монгол Улсад суугаа Онц бөгөөд бүрэн эрхт элчин сайд, хатагтай Ивана Гроллава тэргүүтэй Чех улсын парламентын гишүүд манай аймагт ажиллалаа. Одоогийн байдлаар “Их хаадын цуваа” компани 270 айлын орон сууцны байрыг барьж ашиглалтанд оруулсанаар борлуулалт 70 орчим хувьтай яваа гэдгийг компанийн удирдлага танилцуулсан. Гэрээний дагуу гүйцэтгэгч компани “Евро эко төгөл хороолол”-д 1200 хүүхдийн сургууль, хоёр цэцэрлэгийн байрыг өөрсдийн хөрөнгөөр барих үүрэгтэй. Гэсэн ч өнөөдрийг хүртэл сургууль, цэцэрлэгийн суурь тавигдаагүй байгаа учир тус компанийг нийгмийн хариуцлагаа биелүүлэхгүй байна гэж Орхон аймгийн Засаг дарга Д.Батлут онцолж ярилаа. Гүйцэтгэгч компани болох “Их хаадын цуваа” ХХК-ийн гүйцэтгэх захирал Н.Сүхбаатар “Монгол Улсын хэмжээнд ипотекийн зээл олгохгүй зогссоноос компанийн хэмжээнд 15 тэрбум төгрөг түгжигдэж, алдагдалтай байна” гэсэн тайлбарыг хийлээ. Төслийн хүрээнд 2020 он хүртэл 1324 айлын орон сууц баригдана. Цагаанчулуут багийн нутаг дэвсгэрээс 80 гаруй айлын хашааг чөлөөлж, дахин төлөвлөлт хийснээр, гүйцэтгэгч компани 70 айлыг орон сууцаар хангах үүрэг хүлээх юм байна. Айлуудыг орон сууцаар хангах, сургууль, цэцэрлэг барих зэрэг гэрээнд заасан үүргээ тус компани 2020 онд гүйцэтгэж дуусах үүрэгтэй аж. Хоёр улсын Засгийн газар хооронд байгуулсан гэрээний дагуу дээрх үүргээ биелүүлэх эхлэл тавиагүй байгаа учир Орхон аймгийн зүгээс төслийн гэрээг цааш үргэлжлүүлэх талаар ярилцаж, гэрээнд саналаа тусгах хүсэлтээ илэрхийлсэн байна. Б.Чимэдлхам [sgmb id="1"]