Аймгийн Засаг даргын нэгдсэн шуурхай зөвлөгөөнийг Засаг даргын орлогч А.Түвшинжаргал удирдан явууллаа. Тэрээр зөвлөгөөний төгсгөлд хэлтэс, албадын дарга нарт хэд хэдэн чиглэлээр үүрэг өглөө. Тухайлбал, УИХ-ын чуулганаар ирэх оны Улсын төсвийг хэлэлцэнэ. Тиймээс төрийн байгууллагуудын удирдлагууд өөрсдийн чиг үүргийн дагуу харьяа яамдтайгаа холбогдож төсөвт тусгах ажлын саналуудаа өгөх хэрэгтэйг хэллээ.
Мөн цахилгаан эрчим хүчинд холбогдоогүй айл өрхүүд болон шинээр суурьшил бий болсон хэсгүүдтэй холбоотой судалгаа, бүртгэл хийж эргэн танилцуулах үүргийг холбогдох байгууллагуудад өглөө.
Түүнчлэн Нийгмийн даатгалын сангаас хөнгөлөлттэй үнээр эм олгодог эмийн сангуудтай холбоотой үүсэж буй асуудлыг шийдвэрлэхийг Эрүүл мэнд, нийгмийн даатгалын хэлтсийн даргын үүрэг гүйцэтгэгчид үүрэг болголоо. Учир нь хөнгөлөлттэй үнээр эм олгодог эмийн сангуудад зарим нэр төрлийн эм байдаггүй талаар олон иргэн гомдол гаргасаныг онцоллоо.
Энэ сарын 28-нд АИТХ-ын ээлжит 3-р хуралдаан болно. Уг хурлаар аймгийн Засаг даргын 2016-2020 оны үйл ажиллагааны хөтөлбөрийг хэлэлцэн батална. Тиймээс хэлтэс, албадууд уг хөтөлбөрийн төсөлд тусгасан саналуудаа дахин нягталж үзэх хэрэгтэй гэж Засаг даргын орлогч А.Түвшинжаргал хэллээ.
Эх сурвалж: Erdenet.mn
[sgmb id="1"]
