“Элгээ хайрлая-4” өдөрлөгийг “Эрдэнэтийн эрүүл иргэн” ТББ-аас өнгөрсөн амралтын өдөр хэвлэл мэдээллийн байгууллагын ажилтнуудын дунд зохион байгууллаа. Орхон аймагт тохиолдож байгаа хавдрын өвчлөлийн дийлэнх хувийг элэгний хавдар өвчин эзэлж байгаа аж. “Элэгний хавдар өвчнөөр нас барагсадаас 80 орчим хувь нь оношлогдоод сар гаруйханы дотор нас барж байгаа нь тун харамсалтай” гэж “Эрдэнэтийн эрүүл иргэн” ТББ-ын Удирдах зөвлөлийн гишүүд ярьж байна. Энэ байгууллагын Удирдах зөвлөлийн даргаар сэтгүүлч Ц.Ариунаа ажилладаг. Байгуулагдсан гурван сарын хугацаанд “Элгээ хайрлая” өдөрлөгийг дөрөв дэх удаагаа зохион байгуулж, 100 гаруй хүнийг В вирусын вакцинд хамруулж, 20 орчим хүний С вирусын эмчилгээг эхлүүлж, эдгээрээс нэг хүн бүрэн эдгэрээд байна. Тэднийг зорин ирсэн хүмүүст “Меди пас” эмнэлгийн элэгний В,С вирус тодорхойлох шинжилгээ, дотор эрхтэний хэт авиан шинжилгээ буюу ЭХО-ны үзлэгийг хямдралтай үнээр хийлгүүлж, амьдралд нь том тус хүргэж байна. Элэгний вирус тодорхойлох шинжилгээгээр вирусгүй гарсан хүмүүст тэр дор нь вакцин хийж үйлчилж байгаа “Меди пас” эмнэлгийнхэний үйлчилгээ, ажилчдын соёл үнэхээр сайхан байлаа. “Эрдэнэтийн эрүүл иргэн” ТББ-ын гүйцэтгэх захирлаар манай аймагт амьдарч байгаа Гавьяат эмч Р.Бадарч ажиллаж, мэргэжлийн үнэтэй зөвлөгөө өгч, бусдын төлөө буянтай ажил эхлүүлжээ. “Элгээ хайрлая” өдөрлөгийг “Меди пас” эмнэлэг, БОЭТ-ийн Хавдрын тасаг, “Эм импекс концерн” дэмжин ажиллаж байна.