Орхон аймгийн харьяат 17-23 насны иргэд БНСУ-ын  Сүнчон үндэсний их сургуулийн хэлний бэлтгэлд тэтгэлэгтэй суралцах нөхцөл бүрдээд байна. Энэ талаар аймгийн Боловсролын газрын дээд боловсрол хариуцсан арга зүйчээс дараах тодруулгыг авлаа. 

-БНСУ-ын Сүнчон их сургуулийн хэлний бэлтгэлд  Орхон аймгийн  иргэд тэтгэлгээр  суралцах боломжтой болсон. Энэ талаар мэдээлэл өгнө үү? 
-Аймгийн Засаг даргын 2024-2028 оны үйл ажиллагааны хөтөлбөрт “Суралцагчдад ажил мэргэжлийн чиг баримжаа олгох, сонгох боломжтой төрөлжсөн ахлах сургуулийг байгуулж төгсөгчдийг гадаадад их, дээд сургуульд суралцхад дэмжлэг үзүүлнэ” гэж тусгасан. Энэхүү заалтын  хэрэгжилтийг хангах зорилтын хүрээнд аймгийн  Боловсролын газар БНСУ-ын Сүнчон их сургуультай хамтын ажиллагааны санамж бичиг байгуулсан.   Энэ хүрээнд манай аймгийн 17-23 хүртэлх насны иргэн Сүнчон их сургуулийн хэлний бэлтгэлд тэтгэлгээр  суралцах боломж бүрдээд байна. Хоёр тал багагүй хугацаанд харилцан зөвшилцсөний эцэст тэтгэлгээр суралцуулах тухай журмаа батлан, иргэдэд мэдээлэхэд бэлэн болоод байна. 

Хэлний бэлтгэлийн нэгдүгээр улирлын сургалтын төлбөр 7 сая төгрөгийг орон нутгийн төсвөөс бүрэн хариуцна. Жилдээ 30 хүүхдийг тэтгэлэгт хамруулахаар төлөвлөсөн. 

-Тэтгэлэгт хамрагдах хүсэлтэй иргэнд тавигдах гол шалгуур нь юу байх вэ? 
Тэтгэлэг хүсэгч удирдамжийн хавсралтаар батлагдсан 30 элсэх мэргэжлийн жагсаалтаас зөвхөн нэг  мэргэжлийг сонгож, тухайн мэргэжилд харгалзах хичээл болон англи хэлний хичээлээр элсэлтийн ерөнхий шалгалт өгсөн байна.  Мөн тэтгэлэг хүсэгчийн төрсөн аав, ээж, ах, эгч, дүү, асран хамгаалагчид нь БНСУ-д хууль бусаар оршин сууж байгаагүй, суудаггүй, өмнө нь тус улсад зорчсонтой холбоотой ямар нэгэн зөрчилгүй байх, эрүүл мэндийн хувьд ямар нэгэн архаг хууч болон халдварт өвчингүй, хоол хүнс, ус, цаг агаарын өөрчлөлтөд дасан зохицох чадвартай байх гэх мэт удирдамжид  заасан шалгууруудыг хангасан байна. 

-Тэтгэлэгт хамрагдах хүсэлтэй хүүхдүүдийн бүртгэлийг хэрхэн зохион байгуулах вэ. Хүүхдүүд хэзээнээс сургууль руугаа явах вэ? 
-Тэтгэлэг хүсэгчдийн бүртгэлийг удирдамжид заасны дагуу ирэх дөрөвдүгээр сарын  21- 25-ны өдрийг дуустал Боловсролын газарт хүлээн авна. Тэтгэлэгт тэнцсэн сурагчид ирэх намар есдүгээр сарын 1-нээс Сүнчон их сургуульд хичээлдээ орохоор төлөвлөсөн байгаа.

-Тэтгэлэгт хамрагдсан хүүхдүүдэд цаашид ямар боломж бий болж байгаа вэ? 
-Тэтгэлэгт хамрагдсан суралцагчид маань  хэлний бэлтгэлээ амжилттай төгсвөл бакалаврын хөтөлбөрийн сургалтыг төлбөрөөсөө 30-70 хувиар хөнгөлөгдөх боломж бий. Өөрөөр хэлбэл, хэлний бэлтгэлийн сурлагын дүн 60 хувь, ирц 70 хувиас дээш үнэлгээтэй суралцвал сургалтын төлбөрийн 30 хувь,  солонгос хэлний түвшин тогтоох шалгалтын III түвшинд тэнцсэн бол сургалтын төлбөрийн 70 хувийг хөнгөлнө гэх мэт хөнгөлөлт эдлэх боломжтой. Цаашлаад бакалаврын хөтөлбөрийн II улирлас суралцагчийн өмнөх улирлын сурлагын амжилт, голч дүнг үндэслэн Сүнчон их сургуулиас тэтлэгэ олгоно. Өмнөх улиралд 4-4.5 /голч дүн/ үнэлгээтэй бол 100 хувь, 3.75 үнэлгээтэй бол 80 хувийн сургалтын төлбөрийн хөнгөлөлт эдэлнэ. 2.9-өөс доош голч үнэлгээтэй суралцвал суралцагч өөрөө төлбөрөө хариуцахаар журамд тусгасан. 

-Энэ тэтгэлэг нь зөвхөн хэлний бэлтгэлийн эхний улиралд хамаарна. Үүнээс цаашхыг суралцагч өөрөө хариуцна гэсэн үг үү? 
Тийм ээ. Орон нутгийн төсвөөс тэтгэлэгт тэнцсэн иргэний  хэлний бэлтгэлийн I улирал буюу 6 сартай тэнцэх хугацааны сургалтын төлбөрийг 100 хувь, тэтгэлэгт хамрагдах хугацааны дотуур байр, хоолны төлбөрийг Сүнчон их сургууль хариуцна. 
Тэтгэлэгт хамрагдагч нь хэлний бэлтгэлийн II улирлаас сургалтын төлбөр, дотуур байр, хоол, эрүүл мэндийн даатгалын төлбөр болон бусад зардлыг өөрөө хариуцах бөгөөд хэлний  бэлтгэлийн дүн, сургалтын чанар зэргээс хамаарч бакалаврын хөтөлбөрт хамрагдахдаа   сургалтын төлбөрийн 70 хүртэлх хувийн  хөнгөлөлт  эдлэх боломжтой. 

- Ямар мэргэжлээр элсэн суралцуулах вэ? 
-Энэхүү хамтын ажиллагааны нэг зорилго нь орон нутагтаа дутагдалтай  мэргэжлүүдээр боловсон хүчин, хүний нөөцөө бэлтгэх юм. Инженерийн чиглэлээр 22, нийгмийн салбарын чиглэлээр 8 гээд нийтдээ 30 мэргэжлээс сонгон суралцах боломжтой. Барилгын инженер, барилга архитектур, цахилгааны инженер, ойн инженер, химийн инженер, цэцэрлэгжүүлэлт гэх мэт  30 мэргэжлийн жагсаалт  байна. 

-Тэтгэлэг хүсэгчийн ар гэр буюу эцэг, эхэд нь тавигдах шаардлага юу вэ? 
-Тэтгэлэг хүсэгчийн батлан даагч буюу эцэг эхийн тогтмол орлого, санхүүгийн чадварыг татвар төлсөн байдал, нийгмийн даатгалаар нотолно.  Эцэг эх нас барсан  тохиолдолд хоёрдугаар батлан даагч буюу төрсөн ах, эгч, дүү эсвэл авга, нагац нарын татвар төлсөн байдал, нийгмийн даатгалаар нотолно. Мөн виз мэдүүлэхээс  доод тал нь 30 хоногийн өмнө 3,500,000 вонтой тэнцэхүйц  төгрөгийг дансанд байршуулна.   

-Ямар хүмүүс тэтгэлэгт хамрагдах хүсэлтэй ирүүлэх боломжтой вэ? 
-Орхон аймгийн харьяат 17-23 насны иргэн байна.  Өөрөөр хэлбэл энэ жил 12-р анги төгсөх суралцагчид болон өмнөх жилийн төгсөгчид тэтгэлэгт хамрагдах хүсэлтээ ирүүлэх  боломжтой. 

Мэдээллийн төв