Монголын гурав дахь хот Эрдэнэт, Орхон аймаг 50 жилийн түүхэндээ удирдлагын бүтцээ анх удаа томруулсан нь анхаарал татах сэдэв мөн үү. Орхон аймгийн Засаг дарга Б.Зоригтбаяр, түүний үндсэн Орлогч буюу аймаг хариуцсан Орлогчоор Д.Соёлчхүү, Эрдэнэт хотын Орлогчоор Б.Мөнхдалай, “Шинэ Илгээлт-50" төсөл болон гадаад харилцаа хариуцсан Удирдагчаар Б.Оюун-Эрдэнэ нар томилогдлоо.

-Аймгийн Орлогч Д.Соёлчхүүгийн албан тушаал нь 100 гаруй мянган хүн амтай Орхон аймгийн Засаг даргын орлогч. -Харин саяхан томилогдсон Б.Мөнхдалай нь 2025 оны 7-р сараас эхлэн хэрэгжих Хот тосгоны эрх зүйн байдлын тухай хуулийн шинэчилсэн өөрчлөлтийн дагуу урьдчилан томилогдсон Эрдэнэт хотын Орлогч. -“Эрдэнэт Үйлдвэр” хэзээ нэг цагт хаалгаа барихад, Эрдэнэт хот үйлдвэрийн дэмжлэггүй хоолоо хэрхэн залгуулах вэ гэдэг үүднээс “Шинэ Илгээлт-50” төслийг Орхон аймаг 6 хөтөлбөр, үйлдвэр 6 хөтөлбөр тус тусдаа хэрэгжүүлэхээр эрх баригч намын Мөрийн хөтөлбөрт тусгасан. Үүний дагуу “Эрдэнэт Үйлдвэр”-ийг орлох том төслийг хэрэгжүүлэх Эрдэнэт хотын ирээдүйг тодорхойлох Удирдагчийн албан тушаалыг гаргаж ирсэн гэж аймгийн Засаг дарга тайлбарлав.

Харин “Эрдэнэт Үйлдвэр”-ийн ерөнхий инженер Т.Батмөнх саяхан “Манай үйлдвэр 50-60 жил ажиллах хайгуулийн нөөцөө тодорхойлсон” гэж ярьсан. Ямартай ч хууль хэрэгжиж эхлээгүй ч хотын статусаа буцаан авах болтугай гээд Эрдэнэт хот Орлогч даргаа угтаж авлаа. Монголыг тэжээдэг “Эрдэнэт Үйлдвэр” 50 жилийн дараа хаалгаа барихад Эрдэнэт хот дажгүй өөрийгөө аваад явахыг билэгдээд том төсөл эхлүүлчихлээ. Орхон аймаг ирэх жилүүдэд хөгжлөөр цойлох нь ээ.