Орхон аймгийн хэмжээнд өрнөж буй бүтээн байгуулалт, хөрөнгө оруулалтын болоод тендерийн ажлыг бүхэлд нь бодлогоор зохицуулах үүрэгтэй Хөрөнгө оруулалт, хөгжлийн бодлогын хэлтсийн дарга С.Даваадоржоос цаг үеийн сэдвээр тодруулга авлаа.  

-Энэ жилийн тендерийн ажлын хөрөнгө оруулалт өмнөх жилээс нэмэгдсэн. Ямар ажлууд дээр хөрөнгө оруулалтаа илүү байхаар төлөвлөсөн бэ?

-Энэ онд нэлээд хөрөнгө оруулалт хийгдэхээр төлөвлөсөн. Улсын төсөв дээр орон нутгийн хөгжлийн санг нэмэгдүүлсэн. “Эрдэнэт үйлдвэр”-ийн 50 тэрбум төгрөгийн авто замын ажлыг нэмсэнээр Орхон аймаг өмнөх жилүүдээс нэмэгдсэн байдлаар 115 тэрбум төгрөгийн хөрөнгө оруулалтын ажил хийнэ. Нийт 230 ажил гүйцэтгэнэ. Өмнөх он жилүүдээс онцлох ажлуудын нэг нь инженерийн шугам сүлжээнээс илүү гэрэлтүүлгийн ажлыг онцолсон.

Камержуулалтыг нэмэгдүүлнэ. Өнгөрсөн онд 638 камер нэмсэнээр, 1200 гаруй камертай болж, Орхон аймгийн камерын хяналтын систем иж бүрэн сайжирсан. Үүнээс гадна 50 тэрбум төгрөгийн автозамын онцлох ажил байгаа. Бид иргэдийн хүсэлтээр замын эвдрэлээс шалтгаалж, Дэнжийн замыг иж бүрэн шинэчлэхээр төлөвлөсөн. Мөн иргэдийн хүсэлтээр ПДУ-гийн зам болон “Ёс заншлын өргөө” хүртэлх замуудыг оруулсан. Үүний зэрэгцээ автозамын 46 шинэчлэлтийн ажлыг нэмж өгсөн. Эдгээр ажлууд маань зуны дэлгэр цагт эхлэнэ. Хот тохижуулах газарт техник хэрэгсэл, тоног төхөөрөмж авна. Польш улсын хөрөнгө оруулалтын төслөөр татан зайлуулах тээврийн хэрэгсэлүүд авч байсан. Энэ жил механизмууд төслийн хүрээнд авч байна. Мөн “Эрдэнэт Ус” ОНӨК-д тоног төхөөрөмж болоод парк шинэчлэлтийн ажил хийнэ. Энэ жилийн хөрөнгө оруулалтын ажлаас 10 орчим тэрбум төгрөгийн тоног төхөөрөмжийн худалдан авалтын, үлдсэн нь бүтээн байгуулалтын ажил байгаа. Мөн улсын төсвөөр 43 тэрбум төгрөгийн найман барилга барихаар төсөвлөөд байна.

-Хөрөнгө оруулалт, бүтээн байгуулалтын ажлууд дээр хяналт, чанар, хариуцлагын ажлууд яригдаж эхлэнэ. Эдгээрт яаж анхаарч байна вэ?

-Ер нь чанарыг эрхэмлэж байгаа. Бид иргэдийн оролцоог нэмэгдүүлж, тухайн баг дээр хэрэгжих төсөлд тэтгэвэртээ гарсан инженер,  төрийн бус байгууллагын хүмүүсийг оролцуулж хяналт тавиулах гэж байна. Чанар, хяналт сайжраад ирвэл гүйцэтгэлүүд болоод авто зам,  бусад ажлууд давхар сайжирна гэж үзэж байгаа.