Орхон аймгийн Хот тохижуулах газрын төсөв, санхүүгийн зарцуулалт, ажилчдын цалин хөлстэй холбоотой асуудлаар тус газрын дарга Б.Мөнхдалайтай ярилцлаа.

-Хот тохижуулах газрын энэ оны төсөв 10 тэрбум төгрөг батлагдсан. Энэ нь өнгөрсөн жилийнхтэй харьцуулбал хэр нэмэгдсэн бэ?

-Манай төсөв нэмэгдсэн гэхээс илүү үйл ажиллагаа нэмэгдсэн гэж ойлговол илүү үр дүнтэй. Илүү зөв талаас нь харах боломжтой. Манайд 10.7 тэрбум төгрөгийн төсөв баталж өгсөний 63 хувь нь ажилчдын цалинд зарцуулагддаг. Мөн 18 хувь нь шатахуунд зарцуулдаг. Дээр нь “Эрдэнэт ус” компанийн гэрэлтүүлэгт нийт төсвийнхөө 15 хувийг зарцуулдаг. Үндсэндээ 10 хувь нь үлддэг. Үүнд 22 төрлийн зардал гардаг. Ажлын хувцас, хамгаалах хэрэгсэл, ус, цахилгаан дулааны зардал гээд. Ерөнхийдөө 10.7 тэрбум гээд өндөр дүнтэй сонсогдож байгаа боловч үүний 10 хувийг л үйл ажиллагаандаа зарцуулдаг гэсэн үг. Өмнөх оноос 2.1 тэрбум төгрөгөөр нэмэгдсэн. Өмнө нь 8.5 тэрбум төгрөгийн төсөвтэй байсан. Энэ нь бид өнгөрсөн оны наймдугаар сард төсвийн тодотголоор 36 ажилтны орон тоо батлуулсан. Үүний 14 нь орон сууцны хороолол нэмэгдсэнтэй холбоотойгоор СӨХ болон бусад байгууллагаас зам талбайн цэвэрлэгээ үйлчилгээ хийх шаардлагатай гэсэн хүсэлт ихээр ирсэн. Хэдийгээр орон тоо нэмэгдсэн боловч өнөөдрийг хүртэл нэмэгдэл хүч хэрэгтэй байгаа. Учир нь Сансар худалдааны төвийг тойрсон орон сууцны хорооллууд, Уурхайчин 1, 2 хороолол, 2-а хороолол буюу “Оргил” худалдааны төвийн арын орон сууцны хороолол, 1-а хороолол гээд шинэ суурьшлын бүсийг дагаад бидний ажил нэмэгдсээр байна. Төсөв нэмэгдэх бас нэгэн шалтгаан нь автозамын засвар үйлчилгээг манай байгууллага он гараад хариуцаад явж байгаа. Энэ ажилд бид долоон хүн нэмээд нийтдээ 286 хүнтэй болсон. Өмнө нь 279 ажилтантай байсан. Манай үйл ажиллагаа өргөжин тэлэхийн хэрээр бид нэмэлт хүчээ төсвөөр батлуулж, аймгийн хэмжээнд авто замын нөхөөсний ажлыг хоёр бригад болоод хийгээд явж байна.

-Өнөөдөр Хот тохижуулах газрын ажилчид маань хэдэн төгрөгийн цалин авч байна вэ?  Ер нь ажилчдын дундаж цалин хэд байна вэ?

-Одоогийн байдлаар манайх 286 ажилтантай үйл ажиллагаа явуулж байна. Нийт төсвийн 63 хувийг ажилчдын цалинд зарцуулж байна. Хот тохижуулах газар нь төсөвт байгууллага учраас ТҮ1-ТҮ10 зэрэглэлийн хооронд цалинжаад явдаг. Ажилчид бүх татвараа суутгаад гар дээрээ 1-1.5 сая төгрөгийн цалин авч байна. Энэ нь зэрэглэлээс болон олон жилийн нэмэгдлээс хамаарч байна. Бид он гараад ажилчдынхаа хоолны мөнгийг өгдөг болсон. Өмнөх оны долдугаар сарын нэгнээс ажилчдын доод талын цалин 750 мянга болсон. Үүн дээр 20-40 хувь нэмэгдсэн. Үүнээс НДШ, ХХОАТ суутгаад гар дээрээ ерөнхийдөө 1-1.5 сая орчим төгрөгийг авч байна.

-Хот тохижуулах газрын ажилчдын ажлын орчин хүнд нөхцөлдөө ордог. Ялангуяа гадна зам талбайн үйлчэгчид болон хог ачиж тээвэрлэж байгаа хүмүүсийн хувьд хүнд нөхцөлд ажилладаг. Ажилчдын орчин нөхцлийг сайжруулах боломжгүй байлаа гэхэд ажлын багаж хувцасны хангамж дээр хэр анхаарч байна вэ?

-Тэгэлгүй яахав. Энэ асуудал дээр сайн анхаардаг. Ажиллах нөхцлийг нь хангаж байж хүмүүсээр ажил хийлгэнэ. Дээр нь нөхцөл сайтай газар ажилчид ажиллах дуртай байдаг. Өнөөдөр бид хандлага гэж ярьдаг. Энэ хандлагыг бид хөгжүүлэхийн тулд ажлын байран дээр таатай нөхцлийг бүрдүүлэх ёстой. Энэ чиглэлээр нилээдгүй ажлыг хийж байна. Манай багаж хэрэгслүүд харьцангуй гайгүй. Тухайлбал өвс хамах багаж гэхэд гурван төрлийн багаж байна. Жил ирэх тусам ХАБ-ын өвөл зуны гутал хувцсыг нилээн шаардлага хангасан байдлаар шийдэж байгаа. Тийм учраас ажилчдаасаа санал авч байна. Саяхан нэг компани гутлаа танилцуулсан. Манай хоёр ажилчин гутлыг нь өмсөөд явж байна. Мөн “Дархан Нэхий” ХХК-ийн гутал сайн гэж манай ажилчид ярьдаг. Ажилчиддаа өмсүүлж туршиж үзэх гээд ярьж байна. Одоо ХАБ-ын хувцасны тендер зарлах гэж байна. Цагийн тулгаж авахаас илүү өмнө нь зарлаад туршиж үзэж байгаад бүтэн захиалгаа хийгээд авах нөхцлийг хангаж байна.