Одоогийн УИХ-ын гишүүн Д.Батлут Орхон аймгийн Засаг дарга болсон даруйдаа 2018 онд тухайн үеийн аймгийн Иргэдийн хурлын дарга П.Пүрэвлхагватай хамжин Эрдэнэт үйлдвэрээс аймгийн төсөвт орох ёстой 579 сая төгрөгөөр зургаан автомашин аваад унаж тансаглаж байлаа. Энэ нь ч илчлэгдэн элдвийн маргаан дэгдээсэн. Харин мань хашрууд гүрийж, гүлдийсээр хэл амыг тэгсхийгээд өнгөрөөсөн.

Авсан автомашинуудыг тодотговол: Ланд Крузер-200 нэг ширхэг, Prado 150 хоёр ширхэг. Toyota Highlander автомашин нэг, Ланд Крузер-76 гээд зураг хөрөг, нотлох баримттайгаа хэвлэл мэдээллээр нэг явсан. Харин өнөөдөр төсвийн болоод татварын хуулийг зөрчин байж авсан өнөөх автомашинуудын дүр нь бүү хэл сураг нь ч байдаггүй. Аймгийн орон нутгийн өмчид авсан автомашинуудыг амьных гэж андуураад ажлаа өгөхдөө аваад явчихна гэж байх уу. Аль эсвэл хямдхан үнээр акталж арилжаад дусгав уу. Ямартай ч одоогийн орлогч дарга М.Түмэнжаргал 00-01 ОРА улсын дугаартай хар өнгийн Соната-7 загварын жижиг автомашин унаж явна билээ.

Хачин юм шүү. Өмнөх Засаг даргын унаж байсан том жийпийг хайрлаж гамнаад, хадгалж нуугаад байна уу. Эсвэл хаа нэгтэй осолд оруулчихаад засвараас гарахыг нь хүлээж сууна уу. Бусдын яриагаар бол 2-3 удаа ямби мөргөлдөөд нам зогсчихсон, 20 гаруй сая төгрөгний үйлчилгээ хийлгэж байгаа гэх элдвийн яриа сонсогдох юм. Эрхэм орлогч өөрөө унаж яваад унагаж сэвтээгээгүй бол аймгийн мэдэлд байх ёстой автомашинууд хаашаа алга болсны учрыг нэг тайлна байгаа.