Хавар болоход хэн хүнгүй л өөрчлөлт шинэчлэлтийг хүсэж, засвар үйлчилгээ, тордлого арчилгааг эхлүүлдэг. Энэ ч зарчмаар өргөө гэрийн өнгө дизайнаар оролддог хэсэг бүлгийг онцлон, анхаарал сонордуулга өгөх гэсэн юм.

Аймгийн шуурхай мэдээллийн утсанд өнгөрөгч долоо хоногт есөн дуудлага ирсэний дийлэнх нь СӨХ үйлчилгээтэй холбоотой байсны дотор орон сууцны даацын хана нураасан дуудлага байсан. Энэ гомдлын дагуу зохих арга хэмжээ авч эргүүлэн сэргээх сануулга өгч шийдвэрлэсэн байна. Хэдийгээр асуудлыг газар дээр нь зохицуулан арга хэмжээ авсан энгийн мэдээ шиг боловч стандарт шаардлагыг зөрчих нь ямар аюултай болохыг иргэн бүр мэддэггүй. Мэдсэн ч тоодоггүй.

 Иргэн та бор гэртээ богд байж болно. Гэхдээ бусдын эрүүл аюулгүй орчинд амьдрах эрхээр хязгаарлагдан амьдардаг гэдгээ үргэлжид санах үүрэгтэй. Гэр дотрох хана шал таазыг хүссэнээрээ өөрчлөх эрх байхгүй ээ л гэсэн үг. Ялангуяа нийтийн орон сууцанд амьдрагсад. Таны амьдардаг орон сууцыг мэргэжлийн инженер стандартын дагуу зурж, босгож батлуулаад өнөөдөр тэнд гэр бүл, үр хүүхдүүд амьдран суудаг. Гэтэл хэн нэгэн зоргоороо, зөрүүдлэн даацын хана буулгаж тансаглан амьдрах гэж байгаад орон сууцны барилгыг тэр чигт нь нурааж орхивол яах вэ.

 Даацаа алдсан тоосго, цемент шавар нурчихдаг юм шүү дээ. Хана тааз шаландаа засвар өөрчлөлт хийх гэж байгаа бол эрхэм та үүнийг анхааралдаа авчихна биз. Бусдын эрхээр таны эрх хязгаарлагддаг гэдгийг үргэлж санаарай. Өөрийн болоод өрөөлийн булшыг ухсан буруутан болчих вий дээ.