Аймгийн Засаг даргын шуурхайд Хот байгуулалт, барилга захиалагчийн албаны дарга, аймгийн Ерөнхий архитектор Ц.Баяржаргал мэдээлэл хийлээ. Тэрбээр. “Аймгийн хэмжээнд энэ жил 133 хөрөнгө оруулалтын ажил хийнэ. Нэг үгээр бол 133 хөрөнгө оруулалтын ажилд тендэр зарлана гэсэн үг. Манайхаас зураг төсөв нь бэлэн болсон ажлууддаа тендэр зарлуулахаар аймгийн Орон нутгийн өмчийн газарт хүргүүлж байгаа. Аймгийн Засаг даргын өгсөн үүрэг даалгаврын дагуу эхний нэлээн хэдэн ажилд тендэр нь зарлагдаад заримынх нь шалгаруулалт болоод ажил эхэлсэн гэж ойлгож байгаа.

Зарим цөөн тооны ажилд оролцогч байхгүйгээс шалтгаалан дахин зарлах ажил мэр сэр гарч байгаа. Орон нутгийн Өмчийн газрын Худалдан авах ажиллагааныхан тендэрээ зарлаад, шалгаруулаад гэрээ байгуулах тэр цагаас манай байгууллагын хувьд хяналтаа тавьж эхэлсэн. Хүн хүчний дутагдал бол бий. Мэргэжилтэй сайн боловсон хүчин цалин голоод ирэхгүй байна. Томоохон компани, Эрдэнэт үйлдвэр цалингаар зодоод тэднийг авчих юм. Түүнээс биш бид бүхий л боломжоороо ажлуудад хяналт тавьж байна. Яг өнөөдрийн байдлаар аймгийн хэмжээнд худалдан авах ажиллагаанаас тендэр зарлаад шалгарсан 43 ажилд гэрээ байгуулсан. Нийт 92 ажлын зураг төсөв хийгдээд байгаа. Энэ жилийн хувьд онцлогтой. Улсын төсвийн хөрөнгө орууулалтаар хийх ажил байхгүй. Баян-Өндөр сумын ОНХС-аас хөрөнгө орууулалттай 16, Жаргалантын 7 ажилд гэрээ байгуулсан. Баян-Өндөр сумын ОНХС-ийн хөрөнгө оруулалттай 29, Жаргалантын 12 ажилд зураг, төсөл хийж байна. Дөрөвдүгээр сарын 15-ны байдлаар  аймгийн хэмжээнд 66 ажилд тендэр зарлагдаж, гэрээ байгуулсан. Энэ нь нийт ажлын 49.6 хувь нь болж байна” гэлээ.