Орхон аймгийн удирдлагын зүгээс санаачлан 2021 онд Урлагийн төрөлжсөн сургалттай “Уран эгшиг” сургуулийг байгуулсан. Хуучнаар дөрөвдүгээр сургуулийн дэргэдэх “Хөгжмийн гүнзгийрүүлсэн сургалттай сургууль”-ийг ийнхүү өргөтгөн сурагчдыг авьяасыг нээн илрүүлэх, хөгжүүлэх чиглэлээр бие даасан сургууль бий болгосон. Өнөөдрийн байдлаар “Уран эгшиг” сургуульд 1-11 дүгээр ангийн 350 гаруй сурагч үндэсний өв, соёлыг уламжлах зорилгоор үндэсний хөгжмийн ангид морин хуур, ятга, ёочин зэрэг зургаан төрлийн хичээлийг сурч байна. Мөн хөгжим, дуу, бүжиг, жүжиг, уран зураг, уран нугаралт, дуулаач зэрэг урлагийн төрөлжсөн сургалттай 12 ангитай хичээлэдэг юм.

 Боловсролын салбарын хөрөнгө оруулалтын хүрээнд орон нутгийн төсвөөс 15 сая төгрөгийн өртөг бүхий дөрвөн ширхэг цахилгаан төгөлдөр хуур, нэг цахилгаан даралтат хөгжим олгосон нь “Уран эгшиг” сургуулийн сурагчдын урмыг тэтгэсэн, хөгжөөсөн ажил болжээ. Тус сургууль нь ерөнхий эрдмийн хичээлээ үзэхээс гадна, хүүхдийг сонирхсон урлагийн  төрлөөр  бага ангиас нь зааж сургахын зэрэгцээ хүүхдийн авъяас чадварыг хөгжүүлэхэд илүү анхаарч ажиллаж байна.

Аймгийн Засаг даргын зүгээс “Уран эгшиг” сургуулийн хичээлийн байрыг засахад орон нутгийн төсвөөс 100 сая төгрөг гарган тохилог, сайхан орчин бүрдүүлсэн. Ирэх жил тус сургуулийн барилгад их засвар хийхийн зэрэгцээ урлаг, спортын заал барихаар төлөвлөж буйгаа дуулгасан нь “Уран эгшиг”-ийн багш, сурган хүмүүжүүлэгчид гэлтгүй сурагчдын эцэг, эхийн хувьд сайхан мэдээ байсан тухай тус сургуулийн багш нар ярьж байна.