Хотын төвийн хамгийн том багуудын нэг болох Уурхайчинд сонирхол татах нэг хэсэгхэн газар байдаг. Тус багийн иргэн гэлтгүй нэгдүгээр микрийн оршин суугч Дорж гуай ч энд нэг шавар гараашид машинаа тавьдаг. Хотын төвийн нэг хэсэг газарт ийм амьдралын шаардлага болон өнгө төрхөд нийцэхгүй газрыг энэ удаад өөрчлөхөөр аймаг, орон нутгийн удирдлага шийдсэн нь нүдээ олсон хэрэг болсон. Бид өөрсдийгөө хотын иргэн гэж хэлэх дуртай ч бодит байдал маань түүнд нийцдэггүй амьдарч байсны нэг илрэл нь Уурхайчин багийн олон гарааш тойрсон дүр зураг.

Энд нийтдээ 118 гарааш байдаг. Нэгж талбарын хэмжээ нь  1.3 га газар. Өөрөөр хэлбэл, энэхүү газар дээр гараашийн эзэн болох 118 иргэний л эрх ашиг яригдахаас бус Хот төлөвлөлт, өнгө төрх, бүтээн байгуулалт зэрэгт хамрагдахгүйгээр “Мартагдсан арал” мэт байдалтай явж ирсэн. Үүнийг өөрчлөхийн тулд дээрх 118 иргэнтэй уулзаж, санал хүсэлтийг нь сонсож, ярилцаж ойлголцож чаджээ, манай төрийнхөн. Гарааштай 118 иргэний 73 нь судалгаанд оролцсон байна. Дээрх иргэдийн 39 нь газрын бичиг баримттай бол газрын эзэмших эрхийн хугацаа нь дууссан 4 иргэн гарч иржээ. Бүр зарим нэг гарааш эзэмшигч өөрийнхөө газар дээр хоёр ч гарааш яаж ийж байгаад барьчихаад түүнийгээ түрээслэдэг ч байж. Нэг үгээр хэлбэл, дээрх 1.3 га газрыг төр, засаг хэсэг хугацаанд “мартсан” учраас 118 иргэний нэг хэсэг нь ёстой л нөгөө дураараа дургисан гэсэн үг. Нөгөө талдаа дээрх 1.3 га газар Хот төлөвлөлтийн шаардлага хангахгүй. Харин 118 иргэнд шавар гарааш бариад байсан нь орчин цагт яав ч байж болох асуудал биш байсан.

Ингээд Уурхайчин багийн Аюулгүйн тойргийн баруун талын 118 гараашийг буулгаж, Хот төлөвлөлтийн шаардлага хангахгүй газар дээр нь Төсөл хэрэгжүүлж, барилгажуулахаар ажиллаж байна. Хот төлөвлөлтийн шаардлага хангаагүй, Хотын ерөнхий төлөвлөлтөд ч хамрагдаагүй энэ газарт төсөл хэрэгжсэнээр доороо гарааштай орон сууцны хороолол сүндэрлэнэ. Уурхайчин багийн Аюулгүйн тойрог, “Тамир” төвийн өмнөх газар гэдгээр нь илүү сайн мэддэг эрдэнэтчүүдийн хувьд төсөл хэрэгжсэний үр дүнд бас нэгэн том, орчин үеийн шаардлагад нийцсэн орон сууцны хороололтой болох ажлын гараа сайн байна.