Орхон аймгийн ЗДТГ-аас “Дахин төлөвлөн барилгажуулах, дэд бүтэцжүүлэх төслүүд 2022” улсын анхдугаар зөвлөгөөнийг энэ оны дөрөвдүгээр сарын 1-нд зохион байгуулсан. Аймаг, орон нутгийн удирдлага оны эхээр, хаврын улиралд, бүтээн байгуулалт эхлэхийн өмнө Эрдэнэт хотноо ийм том зөвлөгөөнийг зохион байгуулсан нь чухам л нүдээ олсон ажил байлаа. Дээрх зөвлөгөөнд Барилга, хот байгуулалтын яам,  Нийслэлийн ЗДТГ, Газар зохион байгуулалт, геодези зураг зүйн газар, “Эрдэнэт үйлдвэр” ТӨҮГ, Азийн хөгжлийн банк, МУИС, Нийслэлийн орон сууцны корпораци ХК, ШУТИС, Архангай, Булган, Дархан-Уул, Төв, Сэлэнгэ, Хөвсгөл аймгууд оролцсон нь цар хүрээ, чанар, хүртээмж, далайцын хувьд ч анхаарал татсан зөвлөгөөн байсан юм.

Зөвлөгөөнийг өргөн хүрээнд, олны анхаарлын төвд зохион байгуулснаараа Орхон аймаг дахин төлөвлөлтийн төлөвлөгөөгөө төр засаг болон мэргэжлийн байгууллага, барилгын бизнес эрхлэгчдэд дуулгаж хамтран ажиллах саналаа илгээсэн хэрэг болсон. Эрдэнэт хот гэлтгүй Орхон аймаг хэдийгээр газар нутаг багатай,  цаашид өргөжин тэлэхэд хүндрэлтэй. Хожмоо Эрдэнэтэд бараг л “хөл гишгэх зайгүй” болох тухай явган яриа байдаг ч өнөө цагийн аймаг, орон нутгийн удирдлагууд айлаас эрэхээр авдраа уудал гэдэг зарчмаар ажиллахын эхлэл, бүр цаашилбал хамгийн давуу боломж нь “Дахин төлөвлөлт” юм байна гэдгийг хамгийн түрүүнд олж харж, үүнийгээ ажил хэрэг болгож байгаа нь гадна, дотныхоны нүдэнд өөрийн эрхгүй бууж байлаа.

Эрдэнэт бол хот. 2019 онд батлагдсан Үндсэн хуулийн нэмэлт өөрчлөлтөд ч үүнийг багтаасан. Тэгэхлээр бид бусад аймаг, орон нутаг шиг "Засаг захиргаа, нутаг дэвсгэрийн нэгж, түүний удирдлагын тухай хууль" ч юм уу аль эсвэл Үндсэн хууль дахь “Мал төрийн хамгаалалтад байна” гэсэн жихүүцэм хэдэн заалтыг тойроод эргэлдээд суух нь хөгжлөөс хоцрохын л үндэс болно. Харин бидэнд, Эрдэнэт хотынхонд хамгийн чухал хууль бол “Хот байгуулалтын тухай хууль” ширээний ном байх учиртай. Орхон аймгийн удирдлагууд ч энэ хуулийн хүрээнд сэтгэж, ажиллаж, өөрийн давуу талыг олж харж, хуульд нийцүүлэн Дахин төлөвлөлтийг зохион байгуулахаар ажиллаж байна. Мөн “Хот, суурины газрыг дахин хөгжүүлэх тухай хууль“-ийг ч гараасаа салгаж болохгүйгээр ажиллаж иргэдийнхээ аюулгүй, амар тайван амьдралын баталгаа болсон орон сууцжуулах ажлыг Дахин төлөвлөлтийн хүрээнд энэ онд зохион байгуулна. 

“Хот, суурины газрыг дахин хөгжүүлэх тухай хууль“-ийг дагалдан гарсан

*** Гэр хорооллын газрыг дахин зохион байгуулах зорилгоор өмчлөгч, эзэмшигч газраар хувь нийлүүлэх журам

*** Хот, суурин газрыг дахин хөгжүүлэх үйл ажиллагааны нөхөн олговор олгох журам

*** Хот, суурин газрыг дахин хөгжүүлэх, төсөлд хэрэгжүүлэх талбайг сонгох үлгэрчилсэн журам

*** Хот, суурин газрыг дахин хөгжүүлэх төсөлд оролцогчдын хооронд байгуулах Гурван талт гэрээний үлгэрчилсэн заавар

*** Ашиглалтын шаардлага хангахгүй нийтийн зориулалттай орон сууцны барилгыг буулган шинээр барих үйл ажиллагааны журам

*** Гэр хорооллын газрыг дахин төлөвлөн барилгажуулах үйл ажиллагааны журам

*** Гэр хорооллын газрыг дахин зохион байгуулах үйл ажиллагааны журамуудыг удирдлага болгон Орхон аймаг, Эрдэнэт хотод дахин төлөвлөлтийг хийж хэрэгжүүлэх их ажлын гараа энэ удаагийн Улсын анхдугаар зөвлөгөөн байлаа.