“Эрдэнэт үйлдвэр” ТӨҮГ-ын уурхайчин хамт олон аймаг орон нутгийнхаа төлөө, эрдэнэтчүүдийн төлөө, өрх гэр, үйлдвэрийн ажил үйлсээ даатгахын зэрэгцээ ган гачиг, зуд турхангүй, аюулт өвчин тахалгүй, хур бороо цагтаа бууж газрын гарц арвин байхын төлөө Долоон бурхан од, “Эрдэнэ Мандал овоо”-г тахих, тайх шашны зан үйлийг хийхээр болсон билээ.  Зургаадугаар сарын 8-ны лхагва гарагт 21:00 цагаас Долоо бурхан одыг тахих ёслол Наадмын талбайн урд энгэрт болох юм. Ингэхдээ Долоон бурхан одыг “газарт буулган” лед гэрлээр, олон нийтэд харагдахуйц байрлалаар байршуулах гэнэ. Долоон бурхан одны од бүхэнд харьяалагдах жил, тэдний өргөлийн зан үйл өөр хоорондоо ялгаатай ажээ.

Энэ талаар “Жалданжанчүвлин” хийдийн тэргүүн лам Б.Мөнхтогоо “Шанага талаасаа 1 дүгээр одонд хулгана жилтнүүд харьяалагдана. Тэд тахилгын үеэр одондоо сүү өргөнө. Хоёрдугаар одны харьяалагдах жилтнүүд нь үхэр гахай жилтэй хүмүүс. Тэд ааруул, ээзгийг одондоо өргөдөг. Харин гуравдугаар одонд бар, нохой жилтнүүд харьяалагдах агаад тэд цагаан будаагаар өргөл өргөнө. Дөрөвдүгээр одонд туулай, тахиа жилтнүүд харьяалагдана, тэд улаан буудайгаар өргөл өргөнө. Тавдугаар одонд луу, бич жилтнүүд хамаарах бөгөөд  гүнжидийн үрээр өргөл өргөх учиртай. Зургаадугаар одонд хонь, могой жилтнүүд харьяалагдах бөгөөд вандуйгаар, долоодугаар одонд морь жилтнүүд хамаарах ба хүрэн вандуй өргөж ажил үйлсээ даатган тахилгын зан үйлд оролцох учиртай” хэмээн тайлбарлав.