Аймгийн Засаг даргын шуурхайд боловсролын салбартай холбоотой олон асуудал хөндөгдөв. Засаг дарга С.Батжаргалын зүгээс дараах үүрэг даалгаврыг өглөө. Үүнд, Сургуулийн хүүхдүүдээс орлогоо бүрдүүлдэг сургуулийн захирал байна. Сургуулийн спорт заалыг сурагчдад цагаар түрээсэлж мөнгө олж байна. Ийм байж болохгүй, тухайн сургуулийн спорт заал чөлөөт цагаараа сурагчдын мэдэлд байх ёстой. Сурагчид сургуулийнхаа спорт зааланд мөнгө төлөх ёсгүй. Өнөөдрөөс хойш ийм үйлдэл гаргасан сургуулийн захирлын ажилтай нь асуудлыг ярина. Сурагчдаас мөнгө хурааж зааланд тоглуулж түрээсийн орлого бүрдүүлдэг ч олсон мөнгө нь хэрхэн, юунд зарцуулсан нь ойлгомжгүй, тодорхойгүй байдал бий болжээ.

Хоёрдугаарт, Өнгөрсөн жил Боловсролын газар, сургуулийн удирдлагуудтай уулзахдаа сургууль бүр хүүхэд хөгжлийн танхимтай болох тухай ярьж тохирсон. Үүрэг даалгавар өгсөн. Энэ ажил огт хэрэгжээгүй. Сургуулийн захирлууд Хүүхэд хөгжлийн ганц танхим яагаад байгуулж чадахгүй байгаа юм бэ. Үүнийг хийх ёстой.

Гуравдугаарт, саяхан 16 нас хүрч иргэний үнэмлэхээ гардан авч байгаа сурагчид “Иргэний андгай” өргөсөн. Түүний дараа би хүүхдүүтэй уулзсан. Нэг сурагч асууж байна. Аймгийн Засаг дарга аа, Эрдэнэт хот хүүхдийн таатай орчин бүрдсэн газар мөн үү гэж. Би үнэндээ “Тийм” гэж хариулж чадаагүй, тэгэж худлаа хэлэх боломж ч байхгүй. Хүүхдийн байгууллагын ойр орчмын газар, хорооллуудын тоглоомын газруудын эргэн тойронд хүүхдийн аюцлгүй байдлыг хангаж чадаж байна уу гэдгийг анхаарч харах цаг болсон. Боловсролын газар нь холбогдох албаныхантай хамтраад судалгаа хийх үүрэг даалгавар өглөө.