Монгол улсын Ерөнхийлөгчийн 2021 оны ээлжит сонгууль болоход 43 хоног үлдээд байгаа. 

Сонгуулийн Ерөнхий хорооноос “Монгол улсын Ерөнхийлөгчийн 2021 оны ээлжит сонгуулийг зохион байгуулах аймаг, нийслэлийн сонгуулийн хорооны бүрэлдэхүүнийг баталсан тухай” 40 тоот тогтоолыг энэ оны гуравдугаар сарын 29-нд гаргасан.

Сонгуулийн ерөнхий хорооны 40 тоот тогтоолын дагуу Орхон аймгийн Сонгуулийн хорооны бүрэлдэхүүнийг 9 хүнтэй байгуулсан. Гэтэл аймгийн ЗДТГ-ынхан Сонгуулийн Ерөнхий хороонд “Орхон аймгийн Сонгуулийн хорооны бүрэлдэхүүний нэрс”-ийг албажуулан явуулахдаа ноцтой алдаа гаргасан байна. Тэд аймгийн Сонгуулийн хорооны гишүүн М.Мөнхбаярыг “Аймгийн ЗДТГ-ын Архивын тасгийн дарга” хэмээн тодорхойлжээ. Төрийн сонгуулийг тэр дундаа Ерөнхийлөгчийн сонгуулийг зохион байгуулах төрийнхөний байж байгаа царай энэ. Аймгийн ЗДТГ-ын Хууль зүйн хэлтсийн дарга М.Мөнхбаярыг Архивын тасгийн дарга хэмээн албан тушаалыг нь буруу зөрүү бичиж, явуулж байгаа нь Ерөнхийлөгчийн сонгуульд хэрхэн хандаж буйн илэрхийлэл гэлтэй. Санамсаргүй алдаа юу, эсвэл манай аймгийн ЗДТГ-ынханы бичиг үсгийн боловсрол, мэдлэг, мэргэшил энэ тэр нь иймэрхүү байна уу. Энэ хавар аймгийн Засаг дарга С.Батжаргал нэгэн шуурхайн үеэр төрийн байгууллагынханд хандан “Шүүх дээр аймгийн Засаг даргын захирамж үг, үсгийн алдаанаас болж байнга унадаг. Үүнийгээ анхаараарай” хэмээн хэлж байхав.

Цар тахлын үед цалин хөлс, урамшууллаа бүтэн авч байгаа төрийнхөн ажилдаа үнэхээр хариуцлагагүй хандаж буйн илрэл энэ. Хэн нэг хүн “аймгийн Сонгуулийн хорооны гишүүн М.Мөнхбаяр чинь аймгийн ЗДТГ-ын Архивын тасгийн дарга биш. Төрийнхөн иргэдийг хуурч байна” гээд асуудалд хандвал хэн хариуцлагыг нь хүлээх вэ. “Техникийн алдаа байсан юм аа, М.Мөнхбаяр чинь аймгийн ЗДТГ-ын Хууль зүйн хэлтсийн дарга мөн” гэж Орхон аймгийн 60 гаруй мянган сонгогч нэг бүрт тайлбарлаж өгөх үү. Аймгийн ЗДТГ-ынхан албан бичигт, төрийн сонгуульд нэг иймэрхүү л хандаж байна.