ТОСК-ийн 315 айлын байр оршин суугчдаа хүлээн авч, тэнд орсон айл өрх бөөн баяр хөөрт умбасан. Монголчуудын хувьд гол эрэлт хэрэгцээ бол орон сууц байдаг. 

Уг нь энэ байрыг нэлээн хэдэн жилийн өмнө барьж эхэлсэн. Ашиглалтад орсоны дараа иргэд хаанаас автобусанд суух, явган хүний гарц хаана байх зэрэг олон асуудлыг шийдэлгүй өнөөг хүрсэн. Саяхан тус байрны нэгэн оршин суугч хотын төв рүү орохын тулд зам хөндлөн гарч яваад авто осолд оржээ.

Замын хөдөлгөөний дүрмэнд “...явган зорчигч замын тэмдэг, тэмдэглэгээгүй газраар зам хөндлөн гарч яваад машинд шүргүүлбэл өөрөө буруутах” тухай заасан. Осолд өртсөн иргэн “ТОСК-ийн байрны өмнөх А1001 зам дээр явган хүний гарц, тэмдэг тэмдэглэгээ хийж өгнө үү” хэмээн хүсэлт гаргахад аймгийн Цагдаагийн газраас “Замын тэмдэг, тэмдэглэгээ хийх хөрөнгө байхгүй, аймгийн Засаг даргад ханд” гэсэн хариу өгчээ. Аргагүйдсэн иргэн хүсэлтээ Засаг дарга С.Батжаргалд хүргүүлжээ.

Өвлийн сар дуусаагүй, хаврын цас, шороон шуургатай саруудад явган хүний гарц хийнэ гэдэг цаг хугацаа авах ажил юм. Тиймээс ТОСК-ийн байрны иргэдийн төлөө хугацаа алдалгүй уг зам дээр замын цагдаа ажиллуулах нь зүйтэй болов уу.