“Монголоо сонсъё” үндэсний аяны хүрээнд Орхон аймгийн Ардчилсан нам 2018 оны тавдугаар сарын 22-нд Баянцагаан багийн 300 гаруй иргэнтэй уулзаж, санал бодлыг нь сонслоо. Уг үйл ажиллагаа нь Ардчилсан намын шинэчлэлийн бодлогын хүрээнд хийгдэж байгаа бөгөөд ард түмний улс төрийн байр суурь, иргэд сонгогчдын санал хүсэлтийг сонсож, хүсэлт хүлээлтийг нь тандан мэдэх зорилготой юм. Иргэд, гэрэлтүүлэг, камержуулалт, үнэтэй хогийн сав, цагаан тоос, зам болон эрх баригчдын  нүдээ олоогүй шийдвэрүүдийн талаар багагүй дурдаж байлаа. Тухайлбал, Эрх баригч МАН хууль, шүүх засаглалаас давуу эрх мэдэлтэй болсон, Шүүх хуулийн байгууллага эрх баригчдад үйлчилдэггүй талаар олон хүн санал гомдлоо хэлсэн. Дээд шүүхийн шийдвэр гарчихаад байхад Засаг дарга тэргүүтэй эрх баригчид биелүүлэхгүй, ажилд буцаан томилдоггүй нь “Хуулийн дээр мөнх хөх тэнгэр биш Засаг дарга өөрийгөө байдаг” гэж боддогийн илрэл хэмээсэн юм. Хамгийн гол нь иргэд Баянцагаан багаас аймгийн ИТХ-д сонгогдсон Д.Даваадорж, Д.Батлут нарыг тойрогтоо огт ажил хийдэггүй гэлээ. Иргэд төлөөлөгч Д.Даваадоржийг Улаанбаатар хот руу алга болж, үзэгдэх нь битгий хэл нэрийг нь ч мартах шахсан гэнэ. Харин Засаг дарга Д.Батлутыг "Үнэтэй машин унаж, гадаадаар зугаалж, сошиалаар шоудахгүй төлөөлөгчийнхөө ажлыг хийх хэрэгтэй. Биднийг аймаг орон нутгийн хэмжээнд хэнч тоодоггүй. Өнчин хүү шиг л эзэнгүй боллоо. Баянцагаан багийнханд сонгуулиар амласнаа хэрэгжүүлэх үнэнч хүн хэрэгтэй" гэдгийг сануулж байсан юм. Иргэдтэй хийх уг уулзалт нь бодит мэдээлэл цуглуулах зорилготой бөгөөд  шийдвэрлэх гарц гаргалгааг эрэлхийлж, намын үйл ажиллагаандаа тусгах явдал юм.   Уулзалтын үеэр иргэдийн дунд  санал хүсэлтийг авах хайрцаг явуулж, эмчийн үзлэг, хөгжөөнт тоглоом, “АХА” тэмцээн зохион явуулж аймаг,  орон нутгийн хөгжил цэцэглэлт, хэтийн төлөв, тулгамдсан асуудал зэргээр хэлэлцүүлэг өрнүүлэн, хүүхдүүдийн дунд тоглоом тоглуулж, амттанаар дайллаа. Иргэд “Монголоо сонсъё” аян үр дүнтэй үйл ажиллагаа гэдгийг онцлоод, жил бүр уламжлал болгон явуулах нь зүйтэй гэлээ. Тус аяны хаалтын үйл ажиллагааг зургаадугаар сарын 2-ны өдөр Амарын талбайд зохион байгуулахаар төлөвлөж байгаа ба уламжлал ёсоор Бүрэнбүстийн овоо тахиж уул ус, лус савдгаа баярлуулна. [sgmb id="1"]