“Эрдэнэт хотын өдөр”-ийн Баярын хурал, хүндэтгэлийн ажиллагаа “Уурхайчин” соёлын ордны их танхимд боллоо. Уг хуралд аймгийн болон “Эрдэнэт үйлдвэр” ХХК-ийн удирдлагууд, үе үеийн Засаг дарга нар, ОХУ-ын Буриад Улсын Улаан Үүд хотын зочид төлөөлөгчид, анхдагчид болон Эрдэнэт хотын иргэд оролцов. Аймгийн Засаг дарга Д.Батлут тавьсан илтгэлдээ “Эрдэнэт хотын өдөр бол Орхончууд, Эрдэнэтчүүд бид 40 гаруй жилийн түүхийн ололт амжилт, алдаа оноогоо дүгнэх, ирээдүйд хийх ажлаа төлөвлөх, хүүхэд, залуучууддаа болон олон нийтэд Эрдэнэт хотынхоо бахархал, онцлог, түүхийг хүргэх, Эрдэнэт хотоо сурталчлах иргэн бүрийн бахархлын өдөр юм” гэлээ.
Баярын хурлын үеэр Засгийн газрын болон, Аймгийн ИТХ-ын шагналаар найман иргэн, Засаг даргын нэрэмжит шагналаар 16 иргэн, нийтдээ 29 хүнийг шагнасан юм. Тэдний дунд Эрдэнэт хотын анхдагч Ж.Гэрэлмаа, М.Тунгалаг, Д.Толя, С.Гарамгай, Д.Чимэддорж нар багтжээ.
[sgmb id="1"]
