Орхон, Булган, Хөвсгөл аймгийг нэгтгэсэн УИХ-ын Дөрөвдүгээр тойрогт одоогоор нэр дэвшихээр зориг шулуудсан, тойргоо аль эртнээс услаад эхэлсэн, гурван аймгийн одоогийн УИХ-ын гишүүд гээд 20 гаруй эрхмүүдийн нэр тодроод буй. Тухайлбал,

1. Д.Батлут-МАН  \УИХ-ын гишүүн\

2. Б.Батбаатар-МАН \МАН-ын Хяналтын хорооны дарга\

3. Б.Бат-Эрдэнэ-МАН \Байгаль орчны сайд\

4. П.Баттөр- МАН \Соёлын дэд сайд\

5. Ц.Анандбазар- МАН \УИХ-ын гишүүн\

6. Ж.Бат-Эрдэнэ-МАН \УИХ-ын гишүүн\

7. Б.Баярмагнай-МАН \Батлан хамгаалахын дэд сайд\

8. Л.Энх-Амгалан-МАН \Боловсрол шинжлэх ухааны сайд\

9. Л.Мөнхбаатар-МАН \УИХ-ын дэд дарга, УИХ-ын гишүүн

10. Ц.Даваасүрэн-МАН \УИХ-ын гишүүн\

11.  Б.Оюунгэрэл-МАН \Монголын Эмэгтэйчүүдийн холбооны ерөнхийлөгч\

12. О.Амартүвшин-АН \МҮХАҮТ-ийн ерөнхийлөгч\

13. Б.Ариун-Эрдэнэ-АН  \Булган аймгийн Засаг дарга\

14. С.Гал-Эрдэнэ-АН \Булган аймгийн ИТХ-ын төлөөлөгч\

15. Хаш-Эрдэнийн Эрдэнэбаатар-АН \Мониполо ХХК-ийн захирал\

16. Н.Алтанхуяг-АН \УИХ-ын гишүүн\

17. Ц.Батхуяг-АН \Орхон аймгийн АН-ын дарга

18. Б.Мягмарсүрэн-АН \Орхон аймгийн ИТХ-ын төлөөлөгч\

19. С.Ганбаатар-АН  \УИХ-ын гишүүн\

20. Ш.Идэрбаясгалан-АН \Хөвсгөл аймгийн ЗДТГ-ын дарга асан\

21. П.Лхагважав-АН  \Хөвсгөл аймгийн Засаг дарга\

22. Г.Мөнгөнхуяг-АН \Хөвсгөл аймгийн ИТХ-ын дарга

23. Д.Ганболд-АН  \Орхон аймгийн ИТХ-ын төлөөлөгч\

24. Ч.Батцогт-АН \Чимэд сангийн тэргүүн\

25. Л.Гүндалай-Бие даагч  \УИХ-ын гишүүн асан\

Хойд бүсийн Дөрөвдүгээр тойргоос энэ удаагийн УИХ-д нийтдээ найман УИХ-ын гишүүн сонгогдоно. Тэгэхээр найман мандатын төлөө 20 гаруй хүн сонгуулийн сурталчилгааны 16 хоногт ёстой гал манартал үзэлцэх нь дээ. Одоогийн УИХ-д Д.Батлут, Н.Алтанхуяг, С.Ганбаатар, Ц.Анандбазар, Ж.Бат-Эрдэнэ, Л.Энх-Амгалан, Л.Мөнхбаатар, Ц.Даваасүрэн нарыг Булган, Орхон, Хөвсгөлийн ард түмэн сонгож, УИХ-д эрх ашгаа хамгаалуулахаар суулгасан. Эдгээр гишүүдийн дахин сонгогдох эсэх нь өнгөрсөн дөрвөн жилд тойрогтоо хэрхэн ажилласан байдлаар дүгнүүлнэ гэсэн үг.

Харин Соёлын дэд сайд П.Баттөр, Орхон аймгийн АН-ын дарга Ц.Батхуяг, Булганаас С.Гал-Эрдэнэ нар даагаа нэхэх гэж байгаа. Байгаль орчны сайд Б.Бат-Эрдэнэ Эрдэнэтэд өнгөрсөн жилүүдэд чамгүй ажиллаж, бууриа зассан. Нэр дэвшигчид гурван аймгаар хөндлөн гулд давхихад сурталчилгааны хугацаа даанч богино аж. Сонирхолтой хүний тоонд улстөрч Л.Гүндалай яалт ч үгүй орно. Түүний явсан газар дуулиан шуугиантай, амьдрал буцалж байдаг.

Намын жагсаалт руу 4-10 тэрбумаа төлөөд шууд гишүүнээр сонгогдох хөрөнгөтэй Ц.Анандбазар, Л.Энх-Амгалан, Ц.Даваасүрэн гээд хөрөнгөтнүүд ч байгаа. Эмэгтэй квотоор Монголын эмэгтэйчүүдийн холбооны ерөнхийлөгч Б.Оюунгэрэл өмнөх сонгуулиар Орхон аймагт дэвшээд өвдөг шороодсон ч энэ жил дахин дэвших бололтой. Мөн Хөвсгөлийн уугуул УИХ-ын гишүүн асан, Иргэдийн оролцооны нэгдэл намын тэрүүн Ц.Оюунгэрэл ч энэ тойрогт ирэх магадлал бий. Ц.Оюунгэрэл эрчүүдтэй ан мана үзэхээр хүчтэй эмэгтэй улстөрч.

Дөрөвдүгээр тойрогт Хөвсгөл аймаг 24 сумын 100 мянган км квадрат газар нутагтай, Булган аймаг 16 сумын 49 мянган км квадрат газар нутагтай, Орхон аймаг төв, хөдөөний хоёр сумтай, 844 км квадрат газар нутагтай. Нэр дэвшигчид нийтдээ хөдөөний 41 сумаар 180 гаруй мянган сонгогчдод 16 хоногийн хугацаанд хүрч ажиллана. Өнгөрсөн 2020 оны УИХ-ын сонгуулиар Булган аймаг 40 мянга, Хөвсгөл аймаг 85 мянга, Орхон аймаг 66 мянган сонгогч санал өгсөн байдаг. Энэ тоо нэг их нэмэгдэхгүй болов уу. Дөрөвдүгээр тойрогт нэр дэвших сонирхолтой 20 гаруй горилогч одоогоор байгаа ч энэ тоо нэмэгдэх магадлалтай. Учир нь газар зүйн нөхцлийн хувьд боломжтой, давуу талууд байгаа. Харин улаан, цэнхэрийг алаглуулах уу, дангаар нь гялтайлгах уу гэдгийг сонгогч түмэн л шийдэх байх.