Элсэлтийн ерөнхий шалгалтын онлайн бүртгэл www.eec.mn цахим хуудсаар өнөөдөр 09.00 цагаас орон даяар эхэллээ. ЭЕШ-ын бүртгэлийг Боловсролын үнэлгээний төвөөс зохион байгуулдаг. Ерөнхий боловсролын сургуулийн 12 дугаар анги төгсөгчид ЭЕШ өгөх ба энэ жилийн хувьд монгол хэл бичгийн хичээлийн шалгалтад шалгуулагчдыг ч хамтад нь бүртгэх гэнэ. 

ЭЕШ-ын бүртгэл энэ оны дөрөвдүгээр сарын 20-ны 18.00 цаг хүртэл явагдах аж. Боловсролын үнэлгээний төвөөс бүртгүүлэгчдэд “Бүртгэлийн хугацаа, цагийг сунгахгүй. Нэмэлт бүртгэл хийхгүй” гэдгийг анхааруулж байна.

Боловсролын үнэлгээний төвийн "ЦАХИМ ЗӨВЛӨХ" портал сайт http://help.eec.mn нь элсэлтийн ерөнхий шалгалтад бэлтгэж буй Ерөнхий боловсролын сургуулийн 12 дугаар ангийн суралцагчид болон багш нарт туслах зорилготой цахим зөвлөх хуудас юм. 

Хэрэглээ: Интернетэд холбогдсон гар утас, компьютертэй бол хаанаас ч хэзээ ч ашиглах боломжтой. Өөрийн компьютер дээр нэмэлт программ суулгах шаардлагагүй. Утсаар ашиглах бол ДАТА үнэ төлбөргүй.

Ач холбогдол: Шалгуулагчид ЭЕШ-тай холбоотой бүхий л мэдээллийг хамгийн хялбар, энгийн ойлгомжтой хэлбэрээр нэг дороос авах боломжтой. 

Та тус цахим зөвлөх хуудсанд хандсанаар: 

• Өмнөх жилүүдийн шалгалтын үр дүн, шалгуулагчдын гүйцэтгэл, алдаанд дэлгэрэнгүй шинжилгээ хийсний үндсэн дээр сурагчдын сул гүйцэтгэж буй агуулгад илүү төвлөрсөн Элсэлтийн ерөнхий шалгалттай холбоотой ТВ хичээл, 
• 12 дугаар ангийн сурагчдад зориулсан цахим хичээлүүд үзэх;
• 2018, 2019 оны Элсэлтийн ерөнхий шалгалтын 11 хичээлийн жишиг даалгаварууд (түлхүүр үгтэй)-ыг ашиглан мэдлэг чадвараа сорих;
• Элсэлтийн ерөнхий шалгалтын журам, Элсэлтийн ерөнхий шалгалтын бүртгэлд хэрхэн хамрагдах, ЭЕШ-ын блюпринт зэрэг заавар зөвлөмжүүдтэй танилцах;
• Түгээмэл асуулт хариулт хэсгээс өөрт тулгамдаж буй асуултад хариулт авах;
• Цаг үеийн мэдээ мэдээллийг нэг дороос цаг алдалгүй авах  боломжтой юм.