Засаг дарга арьсаа хамгаалсан уу, үгүй л байхгүй юу
Мэдээ мэдээлэл 2 сарын өмнө     252    0

Цар тахал болох  коронавирус улсын нийслэлд хүчээ авсан. Бүр дийлдэхээ больсон тухай цахим ертөнцөд яахав ийхэв дээрээ тулж байна. Улаанбаатараас орон нутгийг зорих иргэд ирээстэй, тэднийг угтаастай. 

Арай л үлгэр жишээ үлээвэр найрал хөгжим байхгүй. Нутгаа гүйсэн морь, гэрээ санасан иргэнийг яалтай ч билээ. Харин төрийнхөн энэ үед жинхэнэ утгаараа төр шиг ажиллаж чадахгүй байна. Тиймдээ л аймгийн Засаг дарга С.Батжаргал миний мэдэхийн гурав дахь удаа “Жаргалантын постон дээр ажиллаж байгаа цагдаагийнхан ажлаа хийгүй байна. Хотоос ирсэн машинаас жолооч нь буудаг. Гартаа өөрийнхөө шинжилгээний хариуг барьсаар хяналт руу гүйж, бүртгүүлдэг. Машин дотор хэдэн хүн, хаана очихоор яваа нь мэдэгдэхгүй байна. Би өөрийн биеэр шалгаж үзсэн. Цагдаагийнхан анхаарах хэрэгтэй”  хэмээн анхааруулж байсан. Өнөөдөр ч үүнийгээ давтлаа. Аймгийн Засаг даргын энэ үгнээс иргэд айж, эмээж байна. Улаанбаатараас ирж байгаа машин, иргэнд манай аймаг иж бүрэн, найдвартай, хяналт тавьж чадахгүй байна гэж бодогдоход хүрлээ.

Хэд хоногийн өмнө Жаргалантын постон дээр бид сурвалжлага хийхээр очсон. Өмнөөс “Хаанаас, яах гэж яваа юм бэ. Одоо хувцсаа өмсөөд албан ёсоор мэдээлэл өгье. Хоногтоо 24 цагт хоёр удаа л хоол өгдөг. Та нар зовлон мэдэхгүй байна” гээд нэлээн гомдонгуй, голонгуй хэдэн хүн ээлжээ өнгөрөөх гэж, хэл амгүйхэн шиг хоёр яс яаж салах вэ гэсэн шиг угтсан.

Өнөөдөр яг үнэндээ Эрдэнэтэд хотод аюулт короно орж ирээгүй гэдгийг батлах ямар ч газар байхгүй гэвэл та итгэх үү. Үнэн, тийм болоод л аймгийн Засаг дарга та бидний өмнөөс шуурхай бүр дээр “...Замын цагдаагийнхан ажлаа хийхгүй байна. Жолоочоос өөр хүн шинжилгээний хариу үзүүлэхгүй байна. Манайхан арай дэндүү байна...” гэж гурав дахь удаагаа албан ёсоор мэдээллээ.

Эндээс харвал Жаргалантын постон дээр нэг нь шалгасан болж, нөгөөх нь шалгуулж нүглийн нүдийг гурилаар хуурдаг энэ драмаа өөрчлөх хэрэгтэй болжээ. Харин түүний оронд аймгийн хэмжээнд ажилладаг төрийн болон босоо удирдлагатай байгууллага, Орон нутгийн өмчит байгууллагын дарга нарыг тэнд өдөр бүр ажиллуулъя. Яагаад гэвэл, тухайн байгууллагын ямар дарга 2021 оны хэддүгээр сарын хэдэнд ажиллав, хэдний өдөр Эрдэнэт хотод корона илрэв гээд шүүхэд баримт болно. Хариуцлага тооцоход арай хялбар болох бус уу.

Үнэндээ өнөөдөр “ Эрдэнэт хот ногоон бүс боллоо, манай багийн бүтээсэн гавьяа” хэмээн аймгийн Засаг дарга 100 хоногийнхоо үеэр хэвлэлд ярилцлага өгчээ. Хэрэв Эрдэнэтэд корона илэрвэл түүнийг Улаанбаатараас оруулж ирсэн хариуцлагыг үүрэх эзэнтэй болгомоор байна. Эндээс харвал аймгийн Засаг дарга С.Батжаргал арьсаа хамгаалсандаа “...цагдаа нар ажлаа хийхгүй байна” гэж  хэлээгүй. Харин хариуцлага тооцох цаг ирвэл буух эзэнтэй буцах хаягтай байхын тулд үүнийг хэлсэн болов уу.