“Энх Эрдэнэтийн хөгжил”-ийн санаачилгыг ТББ-ынхан, иргэд ч дэмжиж байна
Мэдээ мэдээлэл 2 сарын өмнө     121    1

“Эрдэнэт хотын хөгжил дэвшлийн төлөө хэнтэй ч хамтран ажиллахад бэлэн” уриатай “Энх Эрдэнэтийн хөгжил” ТББ-ынхан шинэ коронавирусын эсрэг Эрдэнэт хотынхоо иргэдийг маскжуулах аяныг санаачлан эхлүүлээд байна. 

Тус төрийн бус байгууллагын залуус өнөөдөр хэвлэлийн хурал зохион байгуулж өөрсдийн эхний ээлжинд цуглуулсан амны хаалтыг нэн шаардлагатай байгууллага, хамт олонд хүлээлгэн өглөө. Тухайлбал, аймгийн Онцгой байдлынханд 400, Цагдаагийн газарт 500, Хот тохижуулах газрын ажилтан, албан хаагчдад 280, Эрүүл мэндийн газарт 300 ширхэг нийлээд 3000 шахам амны хаалтыг олгожээ. Тэд энэхүү аяныхаа  хүрээнд 100 мянган амны хаалтыг цуглуулж иргэдээ түгээх гэнэ.

“Энх Эрдэнэтийн хөгжил” ТББ-ын залуусын “Эрдэнэт хотынхоо иргэдийг Маскжуулах аян”-ы санаачилга дэлхий нийтийг хамарсан цар тахлын дэгдэлт “Covid-19”-ийн эсрэг тэмцэж байгаа энэ цаг үед тун чухал шинэ ажил боллоо хэмээн Эрдэнэт хотын зарим иргэн аяныг дэмжиж хамтран ажиллахаа илэрхийлжээ. Нөгөө талаар ирж яваа цагийн өнгө болсон хаврын урь орсон одоо цагт иргэд амны хаалтыг тогтмол хэрэглэх нь багасаад байгаа. Энэ бүхэнтэй зэрэгцэн “Энх Эрдэнэтийн хөгжил” ТББ-ын хамт олны энэ санаачилга цаг үеэ олсон ач холбогдолтой ажил болсныг зохион байгуулагчид төдийгүй, хэвлэлийн хуралд оролцсон иргэд ч үнэлж байлаа.

Тус ТББ-ынханы зүгээс  санаачилсан  “Эрдэнэт хотын иргэдээ маскжуулах аян”-ыг “Мөнх орших ижий” ТББ, “Зорилготой Эрдэнэт” ТББ, “CUMO” клуб, “Нийгмийн ардчилал Монголын оюутны холбоо” ТББ,  “Орхон аймгийн Залуу багш нарын холбоо” ТББ, “Бид зорилготой залуус” ТББ, “Багшийн удирдлагын клуб”, Таксины үйлчилгээ эрхлэгчдийн холбоо, “Хөгжлийн бэрхшээлтэй иргэдийн холбоо” ТББ, Анхдагч илгээлтийн эздийн холбоо ТББ, Орхон аймаг дахь Увс аймгийн Нутгийн зөвлөл, Эрдэнэт хот дахь  Хөвсгөл аймгийн нутгийн зөвлөл, Баянцагаан багийн иргэн Б.Түвшинжаргал, Зэст багийн иргэн Ц.Дамдинсүрэн, Согоот багийн иргэн Д.Оюунцэцэг нарын зэрэг иргэн, ТББ-ынхан дэмжиж байгаа аж. Зохион байгуулагчдын зүгээс энэ үеэр аяныг дэмжигч байгууллага, хувь хүмүүст баярласнаа илэрхийллээ. Иргэн та ч “Эрдэнэт хотын иргэдийг маскжуулах аян”-ыг дэмжиж хамтран ажиллахыг хүсвэл  “Эрдэнэт хотын хөгжил дэвшлийн төлөө хэнтэй ч хамтран ажиллахад бэлэн” уриатай “Энх Эрдэнэтийн хөгжил” ТББ-ын доорх хаягаар хандаж болох ажээ.

“Энх Эрдэнэтийн хөгжил” ТББ-ын ENKHERDENET.TBB @GMAIL.COM

FB:ЭНХ ЭРДЭНЭТИЙН ХӨГЖИЛ

Утас: 85259911, 90790797