Д.Батлут:Хандив өргөсөн иргэн, аж ахуйн нэгж та бүхэндээ чинь сэтгэлээсээ талархаж байна
Нийгэм, Улс төр 1 сарын өмнө     100    1

Аймгийн ЗДТГ-т, Засаг даргын өргөөнд иргэн, аж ахуйн нэгжүүд аймгийн Онцгой комисст сэтгэлийн хандив, тусламжаа ирүүлсэн билээ. Энэ үеэр аймгийн Засаг дарга Д.Батлутын сэтгэгдлийг сонирхсон юм. 

“Монгол улс төдийгүй дэлхий нийтээрээ энэ коронавирус гэдэг өвчнөөс урьдчилан сэргийлэх, хамгаалах тал дээр маш олон арга хэмжээг зохион байгуулан ажиллаж байна. Үнэхээр шинэ төрлийн вирус халдварлаж гарснаараа дэлхийн хэмжээнд 80 гаруй мянган хүн халдвар авчихсан, 2000 гаруй хүн амь насаа алдсан гээд маш их тийм сөрөг үр дүн гарсан өвчлөл байгаа. Энэ цаг хугацаанд Монгол улс хамгийн их эмзэг, эрсдэл өндөртэй бүсэд багтаж байгаа юм. Яагаад гэвэл бид Хятад ард улстай хиллэдэг. Энэ утгаараа шилжилт хөдөлгөөн, хүний хөдөлгөөнтэй холбоотой асуудал явагддаг учраас агаар дуслын замаар халдварладаг энэхүү өвчин маш хурдацтай тархах нөхцөл байдал үүсгэж болзошгүй учраас эрсдэлтэй улс оронд тооцогдож байна. Энэ өвчлөлийг даван туулах, өндөржүүлсэн бэлэн байдлын цаг хугацаанд монголчууд маань энэ өвчнөөс сэргийлэх тал дээр төр, хувийн хэвшил, хувь хүмүүс бүгд эрвийх дэрвийхээрээ ажиллаж байна. Гэсэн хэдий ч хариуцлагагүй үйлдэл гарч байгааг би өмнө нь ч хэлж байсан. Өнөөдөр олон хувь хүн, аж ахуйн нэгж байгууллагууд энэхүү өвчнийг даван туулахад, энэ өндөржүүлсэн бэлэн байдлын үед өвчлөл гаргахгүй байх тал дээр анхаарч ажиллахад хандив, тусламж өгч байгаад туйлын их баяртай байна. Тухайлбал, Эрдэнэтийн дулааны цахилгаан станц компанийн нийт ажилчид 9.9 сая төгрөгийг аймгийн Онцгой комисст хандивлаж байна. Мөн 10 литр ариутгал, халдваргүйжүүлэлтийн бодис өгсөн. Эрдэнэт Булганы цахилгаан түгээх сүлжээ компани 5 сая төгрөг, тус байгууллагын ажилтан бүр 10, 10 мянган төгрөг цуглуулж аймгийн Онцгой комиссын үйл ажиллагааг дэмжихээ илэрхийлсэн. Мөн өнөөдөр бизнесмэн Давааням маань 3 сая төгрөг хандивлаж байна. Идэр төвийн хамт олон 500 мянган төгрөг хандивлалаа. Хот тохижуулах газрын Үйлдвэрчний эвлэлийн идэвхтэн, сонгуультнууд нь 500 мянган төгрөгийн хандив өргөхөө илэрхийлсэн. Энэхүү хандивын үйл ажиллагаа цаашаа улам өргөжиж явахаар байна. Бид бүхэн энэхүү цугларсан хандивыг иргэдээ хамгаалах, ариутгал халдаргүйтгэл хийх арга хэмжээг улам эрчимтэй явуулахад онцгой анхаарч зарцуулна. Мөн голомтод ажиллаж байгаа хүмүүсийнхээ аюулгүй байдлыг хамгаалах, хоол унааны зардлыг шийдэхээс эхлээд зарцуулна. Бид одоо 35 мянган маск захиалсан байгаа. Түүнийхээ зардалд ч энэ хандиваас оруулна. Ингээд сэтгэлийн хандив, тусламжаа өгсөн, өгөхөө илэрхийлсэн иргэн, аж ахуйн нэгж, байгууллагуудад чинь сэтгэлээсээ  талархаж байгаагаа илэрхийлье. Та бүхний сэтгэлийн энэхүү дэм тусламж хэрхэн зарцуулагдсан талаар ч бид эргэн  мэдээлэх болно” хэмээсэн юм.  

 

 

Сэтгэгдэл бичих

500 тэмдэгт

АНХААРУУЛГА: Уншигчдын бичсэн сэтгэгдэлд ErdenetNews.mn хариуцлага хүлээхгүй болно.
Зочдын сэтгэгдэл (1)