Биатлонч охин “Монгол улсын шилдэг хүүхэд” болжээ
Мэдээ мэдээлэл 3 сарын өмнө     136    0

“Ирээдүйн Одод” сургуулийн 12-ийн А ангийн сурагч Чулуунбатын Бямбасүрэн 2019 оны “Монгол улсын Шилдэг хүүхэд” болжээ. Тэрбээр цана болон биатлоны  спортоор хичээллэдэг. Цанын спортын дэд мастерын зэрэгтэй. “Монгол улсын шилдэг хүүхэд”-ийн шагналыг маргааш Төрийн ордонд Ерөнхий сайд гардуулах гэнэ.

Тэрбээр цаны спортын төрлөөр улс, аймаг, бүсийн болон нэрэмжит тэмцээнүүдээс 20 гаруй алт, мөнгө, хүрэл медаль хүртсэн байна. Цаначин охин Ч.Бямбасүрэн хоёр жилийн өмнөөс дэлхийд өндөр хөгжсөн Монголд төдийлөн сайн хөгжөөгүй биатлоны спортоор хичээллэж багагүй амжилт үзүүлсэн юм. Энэ онд болсон хүүхдийн спортын зургадугаар наадмаас биатлоны төрлөөр амжилттай оролцож өөрийн оролцсон хоёр зайндаа мөнгө, хүрэл медаль хүртсэн байна. Ч.Бямбасүрэн энэ онд Словак улсад болсон дэлхийн аварга шалгаруулах биатлоны тэмцээнд өөрийн оролцсон зайдаа 40 гаруй орны 60 гаруй тамирчнаас 19 дүгээр байрт шалгарчээ. Мөн ОХУ-ын Сахалинд болсон Азийн хүүхдийн анхдугаар наадамд биатлоны төрлөөр оролцож 9 дүгээр байр эзэлсэн амжилт үзүүлсэн байна. Хятад улсад болсон биатлоны цуврал тэмцээнд дөрөвдүгээр байр, намрын хоёр төрөлтийн тэмцээнд мөнгө, хүрэл медаль хүртсэн амжилт үзүүлжээ.

Цанын спортын дэд мастер Ч.Бямбасүрэн Европ тивийн биатлоны спорт нэн өндөр төвшинд хөгжсөн  Герман, Австри, Франц, Швейцарь улсад болсон цуврал тэмцээнд амжилттай оролцсон байна.

Одоо тэрбээр 2020 оны нэгдүгээр сард Швейцарь улсад болох хүүхэд, залуучуудын олимпод оролцох бэлтгэлээ хийхийн зэрэгцээ Европод болж буй цуврал тэмцээнд амжилттай оролцож байна. Саяхан Италийн биатлоны нэрт дасгалжуулагч түүний авьяас чадварыг үнэлж өөрийн багтаа уралдуулах санал тавихын зэрэгцээ түүнийг дасгалжуулан ажиллаж байгаа аж.

Ч.Бямбасүрэн ээж, эмэгтэй дүүгийнхээ хамт Эрдэнэт хотод амьдардаг. Хүүхэд, залуучуудын 2020 оны олимпод амжилттай оролцож эх орныхоо нэрийг дуурсгахын тулд ээж нь цалингийн зээл авч хоёр сая гаруй төгрөгөөр цана авч өгсөн байна. Биатлоны тамирчны хувьд уралдаан тэмцээнд оролцоход сайн цана, спортын нэртэй брэндийн буу, сум хамгийн чухал байдаг. Хүүхэд, залуучуудын олимпод манай улсаас биатлоны төрөлд хоёрхон тамирчин оролцож байгаагийн нэг нь “Ирээдүйн Одод” сургуулийн 12-ийн А ангийн сурагч Ч.Бямбасүрэн юм. Өнгөрөгч есдүгээр сарын эхнээс 12 дугаар сар хүртэл тэрбээр багш, дасгалжуулагчийн хамт Төв аймагт тэмцээний бэлтгэл хийж байгаад Швейцарь улсыг зорьсон юм.

Биатлонч охин Ч.Бямбасүрэн дүү Халиуны хамт

Биатлоны тамирчин Ч.Бямбасүрэнг эх орноо, Эрдэнэт хот, Орхон аймгийн тамирчин сурагчдаа төлөөлөн хүүхэд, залуучуудын олимпод явах гэж байхад нь бид аймгийн ИТХ-ын зарим төлөөлөгч, дарга нартай уулзан сэтгэлийн дэм, санхүүгийн бага ч гэсэн тусламж үзүүлээч гэж хандсан боловч нэг нь ч ойлгож хүлээж аваагүй. “Өө өвлийн спорт юм уу. Биатлон гэдэг чинь юу билээ бөмбөгтэй хоккей гэдэг билүү” хэмээн асуудалд хандсан. Багийн бус ганцаарчилсан спортын төрөлд манай аймгийн дарга нар нэг тиймэрхүү, хөндий хүйтэн ханддаг юм билээ. Энэ спортын төрлийнхөнд олон улсын уралдаан тэмцээнд оролцоход нь манай улс замын зардлыг нь л олгодог аж. Тамирчны хувьд ганц аяга халуун чацаргана ч цагтаа сайн витаминжуулалт болдог. Ч.Бямбасүрэн  “Бид гадаадад тэмцээн уралдаанд оролцоход санхүүгийн хувьд хүндрэлтэй. Ээжийнхээ өгсөн жаахан мөнгөөр хүргэх гэж бэлэн гоймон, буцалсан ус зэргээр л аргалдаг” хэмээн санаа алдаж билээ.

Түүний хувьд төрсөн дүү нь мөн л цанын тамирчин, Монгол улсын цанын спортын мастер. Эгчийнхээ хамт “Ирээдүйн Одод” сургуульд суралцдаг юм.      

 

 

 

 

 

Сэтгэгдэл бичих

500 тэмдэгт

АНХААРУУЛГА: Уншигчдын бичсэн сэтгэгдэлд ErdenetNews.mn хариуцлага хүлээхгүй болно.
Зочдын сэтгэгдэл (0)