Эрдэнэт хотыг Монгол эх орны дөрвөн зүг, найман зовхисоос залуу насны ирмүүн хүслээр жигүүрлэсэн залуус ирж бүтээн босгосон. Хорин нэгдүгээр зууны Монгол улсын ястан үндэстний бүхий л төлөөллөөс бүрдсэн учраас энэ хотод нутгийн хөгжил, уламжлалыг илтгэсэн брэнд бүтээхэд амаргүй. Тиймээс ч Эрдэнэт хотын нүүр царайг социализмын үеэс тахалж ирсэн “Эрдэнэт үйлдвэр”, “Эрдэнэт хивс” гээд хэдэн үйлдвэр нь гадны зочдыг ганц тойруулах морин тойруулга шиг болж, одоо бүр хоцрогдохын дээдээр хоцрогдоод буй.

Аймгийн ИТХ-ын Зөвлөлийн хурлаар “Орхон аймгийн Аялал жуулчлалыг хөгжүүлэх” хөтөлбөрийг 2022 онд хэрэгжүүлсэн” тухай ярилцлаа. Бусад аймгуудаас ялгарч, гадаад, дотоодын жуулчдыг ганц алхуулж, хэдэн долларыг нь нутагтаа үлдээх талаар аймгийн Байгаль орчин аялал жуулчлалын газрынхан өнөөг хүртэл  тодорхой шийдэлд хүрэхгүй байгаагаа ярьлаа. Хамгийн наад зах нь олон хүнийг зэрэг байрлуулах зочид буудал хүрэлцдэггүйг дуулгаж байна.

Аймгийн ИТХ-ын дарга Д.Мөнхбат: “Булган, Хөвсгөлийг зорьж байгаа гадаадын жуулчдын тоо 80-100 мянгад хэлбэлздэг, энэ бол бодит тоо. Эдгээр жуулчид Улаанбаатараас гарч ядраад, манай хотоор дайран өнгөрөхөд нь бид угтах сайхан үйлчилгээг “Эрдэнэт цэцэрлэгт хүрээлэн”-дээ хиймээр байна. Автомашин сонирхогч залууст зориулаад аймгийн хөрөнгөөр дрийпт хийдэг тусгай замыг нь бариад өгчихье. Спортын загасчлалыг Улан-Үдэд биш, өөр аймагт биш, нутагтаа хийхийг зоръё. Өнөөгийн залуусын хүсэл сонирхлын дагуу олон мянган хүнийг цуглуулж чадах тийм орчин бүрдүүлж байж, гаднаас хүмүүс ирнэ” гэсэн саналыг хэлж байлаа.

“Мэргэжлжийн холбоодын төлөөлөлтэй уулзаж, саналыг нь сонсъё. Бид Азид хоёрт ордог, аварга том Бурхан багшийн сэрэг дүрийг бүтээн босгосон. Энэ байгууламжаа тойруулаад гадна дотны жуулчдыг татах тодорхой зүйл рүү орох”-ыг аймгийн ИТХ-ын Зөвлөлийн гишүүд ярьлаа.

Аймгийн ИТХ-ын Зөвлөл энэ удаа Орхон аймгийн Аялал жуулчлалын хөгжлийг шинэ шатанд гаргах эхний алхамаа хийхэд, зөвлөх үйлчилгээний санал, мэргэжлийн холбоодын үг, сурталчилгааны дүр төрх, залуусын хүсэл зэргийг харгалзан үзэхийг чухалчлан санууллаа. Эрдэнэт хотын аялал жуулчлалын хөгжлийг гацаанаас гаргах тодорхой алхам хэрэгтэй байгааг онцоллоо.