Аймгийн ИТХ-ын ээлжит хуралдаан энэ сарын 22-нд болсон. Хурлаар зөвшөөрөл олгох тухай асуудлыг хэлэлцэв. Газрын харилцаа, барилга, хот байгуулалтын газар нь 2019 онд өөрийн давсан орлогоосоо “Toyota Hiасe” машиныг албан хэрэгцээндээ авчээ. Геодезийн хэмжилт хийхэд хэрэгтэй, багаж хэрэгсэлээ ачаад хаана ч төрийн үйлчилгээг хүргэх боломжтой гэж үзээд Газрын албаныхан авсан аж. Улмаар энэ машинаа Орон нутгийн өмчийн албанд зохих журмын дагуу бүртгүүлсэн байна. Гэтэл дээд байгууллага нь “Танай энэ машин манайх байх учиртай. Давсан орлогоос худалдан авсан хөдлөх хөрөнгийг Орон нутгийн өмчид биш, Төрийн өмчид бүртгүүлэх ёстой энэ тэр гэсэн журамтай” гэж хэлээд нэхэмжилсэн байна.

Аймгийн Орон нутгийн өмчийн газраас нэгэнт Газрын албаны дээд байгууллагаас ийм шийдвэр ирсэн тул аймгийн ИТХ-д энэхүү машиныг шилжүүлэх Зөвшөөрөл олгох тухай хүсэлтийг уламжилсан байна. Аймгийн ИТХ-ын хуралдаанаар асуудлыг хэлэлцээд Зөвшөөрлийг нь олгохоор боллоо.

Саяхан манай аймгийн Газрын албаныхан газрын гэрчилгээ, кадастрын зургийг цахимд шилжүүлэхтэй холбоотойгоор гэр хорооллын иргэдэд хүрч багт нь очиж ажилласан. Хашааны газрынхаа шонг  хазгай мурий хатгасан, нэг жижиг доголыг өөрийн болгож хууль бусаар өмчилсөн зэрэг олон асуудлыг шийдэхэд энэ машин тун хэрэгтэй байдгийг тэр үед л мэдэрсэн. Газар дээр нь цахимаар шууд л хэмжилт хйинэ. Хэмжилтийн багаж, тоног төхөөрөмжөө ачаад Явуулын цахим бүртгэлийг хийдэг энэ машиныг ийнхүү Төр аваад явчихлаа. Орон нутгийн Өмчийн газрын мэдээллээс харвал 2019 онд давсан орлогоосоо 27.8 сая төгрөгөөр авсан энэ машины элэгдэл хорогдлыг нь 3 сая 839 мянга, 900 төгрөг гэж үзээд төрийн өмчид шилжүүлэх саналыг оруулсан байна.