Жаран хувийн асалттай байсан гэр хорооллын гэрэлтүүлэг  өнөөдрийн байдлаар 85-90 хувьтай байна. Энэ зун  13 багийн  гэрэлтүүлгийн тэжээлийн блок, толгой, кабель солих ажлыг  “Орхонтек” ХХК  орон нутгийн  төсвийн  нэг тэрбум 300 сая төгрөгийн  хөрөнгө оруулалтаар  гүйцэтгэсэн. Үүнд 1368 ширхэг гэрэлтүүлгийн толгой,   эрчим хүчийг хувиар хэмнэх 30 ширхэг ухаалаг алсын зайн удирдлагын самбар, 70874 метр кабелийн утас шинэчилсэн. 

     Эрдэнэт хот 10 мянга орчим гэрэлтэй.  Гэр хороолол зургаан мянга, авто зам дагуу  төв хэсэгт 3500 гаруй гэрэлтүүлэг бий. 
Орон нутгийн хөрөнгө оруулалтаар 1300 гаруй гэрлийн гэрэлтүүлгийн толгойг засаж шинэчилсэн нь гэр хорооллын 6 мянган гэрэлтүүлгийн 20 хувьд засвар орсон гэсэн  үг юм.  Үлдсэн 80 хувийн гэрэлтүүлгийн засвар нөхөлт шаардлагатай хэсгүүдийг засварлах ажлыг “Эрдэнэт -Ус ДТС”  ОНӨХК гүйцэтгэж буй. Өнөөдөр Дэнж багийн Зүүн дэнжийн гудамд гэрэлтүүлгийг солих ажлыг хоёр бригад  эхлүүлээд байна. 

  Дэнж багийн гэрэлтүүлэг 70 хувийн асалттай, засвар хийх гэрлийн тоогоор  хамгийн бага баг юм.  Зүүн дэнжийн уг хэсэгт шугам сүлжээтэй холбоотой ажил гүйцэтгэж,  гудам руу машин техник  орох боломжгүй нөхцөл байдал үүсээд байсан учир өнөөдрөөс гэрэлтүүлгийг засварлах ажил эхэлсэн.   Эрдэнэ баг 600 гаруй гэрэлтэй хамгийн их гэрэлтэй баг. Баяр наадмын өмнө 100 гэрлийн толгойг сольж засварласан.  Үлдсэн 500 гэрлийн 100 орчмыг нь засварлах шаардлагатай гэрлүүд. Эдгээр 100  гэрлийн  50 хувийг нь зассан гэх мэдээллийг “Эрдэнэт -Ус ДТС” ОНӨХК-ийн цахилгааны инженер Г.Бямба-Очир хэллээ. 

      Гэр хорооллын гэрэлтүүлэг нэг дор 100 хувь асна гэж ойлгох нь өрөөсгөл ойлголт гэнэ. Нөхөлт үйлчилгээ хийгээд 70 хувийн асалттай байсан хэсгийг 75,80 хувийн асалттай болгоход өнөөдөр унтраагүй гэрлийн асалтын хугацаа маргааш дуусч  асахгүй байх магадлалтай. Гэр хорооллын 6 мянган гэрлийг нэг дор хийгээгүй учраас шатна, түүнийг нь нөхөлт хийгээд явах процесс байнга давтагдана гэх тайлбарыг мэргэжлийн байгууллагаас өгч байна. 
       Тухайн гэрлийг хийсэн он буюу ашиглалтын хугацаатай холбоотой гэнэ. Жилд нэг багт 50 гэрэл шинээр нэмэгддэг, дараа жил мөн тооны гэрэл нэмэгддэг учраас хугацаа нь өөр. Ашиглалтын хугацаанаас хамааран гэмтэл үүсдэг, мөн аянга цахилгаан, шон мөргөх зэрэг гадны нөлөөтэй гэмтлээс үүдэлтэйгээр асахгүй байх тохиолдол их байна. Нэг шонгийн гэрэл шатлаа гэхэд багадаа 30 гэрэл дагаж унтардаг. 

    Харин төв зам дагуух гэрэлтүүлгийн  кабелийн утас бүгд газар дор. Кабелийн утасны  насжилт 10-аас дээш жил болсон, хоёр шонгийн хооронд 40-50 метрийн зайтай байдаг ажээ. Өнөөдрийн байдлаар  кабелийн утаснууд багадаа 2-3 залгаа орсон, ихээр орсон борооны ус нэвчиж кабель гэмтэх тохиолдол их гардаг.  Хоёр шон дээр гэмтэл гарлаа гэхэд бусад шонд гэмтэл гарахгүй байх үүднээс удирдлагын систем автоматаар ажиллаж тухайн хэсгийн бүх гэрэл унтардаг байна. Гэмтэл гарсан тохиолдолд тухай бүрт нь засварын ажлыг гүйцэтгэж асалтыг хэвийн горимд шилжүүлдэг талаар хэллээ.