Удахгүй болох аймгийн ИТХ-ын хуралдаанаар “Аймгийн тодотгосон төсөв”-ийг батлах тухай асуудлыг хэлэлцэнэ. Энэхүү тодотгосон төсвийн задаргаан дотор Нийтлэг үйлчилгээний гарын төсөвт 80 сая төгрөг нэмж тусгах асуудал аймгийн ИТХ-ын Зөвлөлийн гишүүдийн анхааралд өртсөн юм. Энэ талаар аймгийн ЗДТГ-ын дарга Д.Соёлчхүү тайлбар хийв. Тэрбээр, “Засгийн газрын тогтоол, Хэмнэлтийн хуульд зааснаар аймгийн хэмжээнд ИТХ-ын дарга, аймгийн Засаг дарга, сумдын Засаг дарга нар албан хэрэгцээндээ автомашин унана гэж заасан. Хууль, Засгийн газрын тогтоолыг хэрэгжүүлэхийн тулд байгууллагын дарга нарын, аймгийн ЗДТГ-ын хэлтсийн дарга нарын албан хэрэгцээний машиныг ашиглахыг зогсоож байгаа. Нийтлэг үйлчилгээний газрын дэргэд дуудлагын автомашины бааз байгуулна. Манай аймагт ганцхан машинтай байгууллага ч бий. Тэднийг бүгдийг нэгтгэн хөдөө орон нутагт томилолтоор явахдаа дуудлагын машин унадаг байдлаар зохицуулна. Зохион байгуулалт хийхийн тулд энэ 80 сая төгрөгийг төсвийн тодотголд оруулсан. Хуульд зааснаар жолооч нарыг нь шууд ажлаас халж болохгүй байгаа. Шийдэх зүйл их бий. Одоогоор байгууллага, хэлтэс, албадын машиныг лацдаж хурааж авч байна. Мөн төсөвт нь бензин, шатахууны мөнгө хэмээн тусгайлан хөрөнгө суулгаагүй байгаа” хэмээх тайлбарыг өглөө.

Манай аймгийн хувьд хөрш зэргэлдээх Булган аймаг шиг 14 сум, нэг тосгон байхгүй. Хөдөөгийн ганц сум Жаргалант нь хар замаар аймагтайгаа холбогдсон. Тэр бүр том оврын жийп унаад давхиад байх шаардлага байхгүй. Өвлийн мал тооллого, ган зудтай үед малчдаа эргэх, тусламж үзүүлэхэд л том оврын жийп шаардлагатай болно. Үүнийг  Дуудлагын машины үйлчилгээгээр зохицуулахаар эрх баригчид шийджээ. Эндээс харвал аймгийн ЗДТГ-ын дарга Д.Соёлчхүү ч маргаашнаас эхлэн хотын төвөөр “ ОРА 13 14дугаартай  Прадо 105” жийпээ унаад давхиад байхгүй нь бололтой. Дарга нарын албаны автомашины асуудал шийдэгдсэнээр нутгийн удирдлагын ордны гаднах авто зогсоол иргэдийн мэдэлд бүрэн ирэх боломжтой болно. Одоо ганц асуудал шийдвэл “ОК” болох гээд байгаа. Нутгийн удирдлагын ордны албан хаагчид ажилдаа ирэхдээ хувийн унаагаараа биш нийтийн тээврээр үйлчүүлдэг болвол автобусны үйлчилгээ хийгээд орлогод ч нөлөө үзүүлнэ. Дархан-Уул аймгийн Засаг дарга өнгөрөгч өвөл “аймгийн ЗДТГ-ын албан хаагчид Захиаргааны гадна талын авто зогсоолд хувийн машинаа тавихыг хориглосон” захирамж гаргасан байдаг. Дарханыхан ч үүнийгээ хэрэгжүүлдэг юм билээ. Иргэндээ ойрхон төрийн үйлчилгээ эндээс эхэлдэг гэж Дарханы иргэд ярьж байсан удаатай. “Яг түүн шиг” манай аймгийн Нутгийн удирдлагын ордны авто зогсоолыг ЗДТГ-ын ажилтнуудын хувийн машинаас чөлөөлбөл иргэдэд их л буян болно доо.