Тэтгэвэрийн хэмжээ 500 мянган төгрөг болж, хувь тэнцүүлсэн тэтгэвэр 400 мянган төгрөгт хүрсэн. Гэтэл Хот тохижуулах газрын 200 шахам ажилчдын цалин 420 мянгаас 507 мянган төгрөгийн хооронд хэлбэлзэж байна. Манай байгууллагын ажилчид 500 мянган төгрөгийн тэтгэвэр авахын тулд цалин нь 547 мянган төгрөгийн цалин авах ёстой юм байна. Тэтгэвэр нэмснийг буруу гэхгүй. Харин 2018 оноос хойш нэмэгдээгүй амьжиргааны баталгаажих доод түвшнийн үнэлгээгээ нэмээч ээ. Манай ажилчдын амьдрал хүнд байна. Ажил хийх хүн олдохгүй байна. Сар ажиллаад 420 мянган төгрөгийн цалин авахгүй гээд хаяад явж байна.

Үүнийг буруутгах арга байхгүй. Хавар, зуны ажлын сезон ороод нэг өдрийн цалин 70 мянган төгрөгт хүрчихлээ. Аймгийн хэмжээнд 420 мянган төгрөгийн цалинтай 670 гаруй хүн бий. Иймд Орхончуудыг төрд төлөөлөн УИХ-д суугаа  Д.Батлут, С.Ганбаатар, Н.Алтанхуяг нарт амьжиргааны баталгаажих доод түвшингээ нэмээч гэсэн ажилчдынхаа  Хүсэлтийг уламжилж байна хэмээн Хот тохижуулах газрын Ажилчдын төлөөлөл, аймгийн Үйлдвэрчний холбооны тэргүүн нар хэвлэлийнхэнд хандсан юм.