Аймгийн Засаг даргын Зөвлөлийн хурлын үеэр 17 дугаар сургуулийн өргөтгөлийн барилгын зарим анги танхимын хана цуурч, суулт өгсөн. Сурагчид хичээл хийх боломжгүй болсоноос үүдэн гүйцэтгэгч байгууллага аймаг хоёрын дунд үүсээд байга маргааны талаар яригдав. “Урагшлах” компанийн буруутай үйл ажиллагаанаас болж барилга суулт өгч, хана цуурч хагарсан учраас хөндлөнгийн байцаагчаар талууд дүгнэлт гаргуулахаар болсон. Монголд ганцхан байдаг  хөндлөнгийн  мэргэжлийн байцаагч нь дүгнэлт гаргахдаа “Ашиглалтын буруугаас ийм байдалд хүрсэн” гэж дүгнэжээ.

Харин аймгийн Засаг дарга С.Батжаргал “Мэргэжлийн байцаагчийн дүгнэлт ашиг сонирхлын зөрчилтэй гарсан. Монгол байдаг ганц байцаагч барилгынхантай олон жил хамтарч ажилласан учраас дүгнэлтэд нь эргэлзэж байна. Аймгаас энэ асуудалд мэргэжлийн хуулийн баг авч ажиллуулна. Шүүхэд хандана. Манай аймгийн Мэргжлийн хяналтын байцаагч н.Азхүүгийн дүгнэлтээр бол барилгын норм дүрмийг нарийн баримталж, мөрдөөгүй. Суурийн шорооны дүүргэлт, чигжээс муу хийсэн гэж гарсан. Үүнээс үүдэн сургуулийн сурагчид хохирох ёсгүй. Аймаг хөрөнгөө гаргаад засварын ажлаа хийх үү дараа нь шүүхээр явж хохирлоо барагдуулах уу гэдэг байдалд хүрлээ. Ингэхгүй бол хөндлөнгийн байцаагчийн дүгнэлтийг шүүхэд өгвөл асуудал нэг жилээр тогтохгүй сунжрах байдалтай боллоо” хэмээн мэдэгдлээ.