Аймгийн Засаг даргын шуурхайд Боловсрол, шинжлэх ухааны газрын дарга О.Ариунгэрэлт 2021-2022 оны хичээлийн жилийн хоёрдугаар улирлын хичээл танхимаар эхэлсэнтэй холбогдуулан мэдээлэл хийлээ.

Хоёрдугаар улирлын хичээл танхимээр эхлэх болсон учраас аймгийн Боловсрол, шинжлэх ухааны газраас тодорхой ажлуудыг хийжээ. 2022 оны хоёрдугаар сарын 10-ны өдөр Боловсрол, шинжлэх ухааны газраас 4 ажлын хэсэг гарч 25 сургууль, 39 цэцэрлэгийн хичээл, сургалтын бэлэн байдалд үнэлгээ хийхэд 98.5 хувийн гүйцэтгэлтэй үнэлэгджээ. Сургуулийн орчны ариутгал цэвэрлэгээ, анги танхимын бэлэн байдал 100 хувь үнэлэгдсэн байна. Хоёрдугаар улирлын хичээл эхлэх болсон тул боловсролын байгууллагын хэмжээнд дараахь ажлыг хийж гүйцэтгэсэн байна.

Үүнд, сургууль, цэцэрлэгийн гадаад, дотоод орчны их цэвэрлэгээг хийж, ариутгал, халдваргүйжүүлэлт, зам талбайн цас цэвэрлэгээг бүрэн хийсэн байна. Мөн сургууль, цэцэрлэг дээр эмчийн өрөө, тусгаарлах өрөөг шаардлагатай хэрэгслээр бүрэн хангаж нөөцийн санг бүрдүүлжээ. Багш, сурагчдын хувийн ариун цэвэр, өвчлөлийг тодорхойлох тандалт судалгааны бүртгэлийг бэлтгэсэн байна.

Сургууль, цэцэрлэгийн анги, бүлэг бүр халуун хэмжигч, гар ариутгагч бэлтгэжээ. Хоёрдугаар сарын 14-ний өглөөний 10.00 цагийн байдлаар цэцэрлэгт гурван настай 1069, дөрвөн настай 1332, таван настай 1457, нийт 3858 хүүхэд хамрагдсан байна. Энэ нь нийт хамрагдвал зохих хүүхдийн 62.8 хувь ажээ.  

ЕБС-ийн сурагчдын 96 хувь нь танхимаар, үлдсэн 4 хувь нь цахимаар хичээллэх хүсэлтээ ирүүлсэн байна.