Аймгийн Засаг даргын даваа гарагийн шуурхай зөвлөгөөн болов. Шуурхайг Засаг дарга С.Батжаргал удирдан явууллаа. Шуурхайн эхэнд аймгийн ЗДТГ-ын Соёлын хэлтсийн даргын үүргийг түр орлон гүйцэтгэгч А.Уранчимэгийг эрдэнэтчүүдэд танилцууллаа.  

Даргын үүргийг гүйцэтгэгч /ДҮГ/  буюу А.Уранчимэгийн хувьд төрийн үйлчилгээний салбараас гэнэтхэн крандуулаад Төрийн захиргааны ажилтан болчихож байгаа. Энгийнээр бол маш том татаасаар энэ албан тушаалд Төрийн албаны тухай хууль, тогтоомж зөрчин байж орж ирсэн гэхэд нэг их хол зөрөхгүй. Төрийн захиргааны албанд орох шалгуур, хууль дүрэм, Төрийн албаны шалгалт гэж бий. А.Уранчимэгийн хувьд Төрийн албаны шалгалтыг нэг удаа өгөөд унасан. Дахиад өгөх тухайд “Би шалгалт өгөхгүй” гээд гэдийсэн. Төрийн захиргааны албанд төрийн албаны шалгалт өгч, нөөцөд бүртгэгдсэн байх наад захын шалгуур байдаг ч энэ удаад Ковидын хуулийг УИХ-аас 6 сараар сунгасан учраас ямар ч байсан А.Уранчимэг 2022 оны долоодугаар сарын 1-н хүртэл ДҮГ гээд явна.

Манай аймагт Соёлын хэлтсийн дарга хийгээд явчих чадалтай, чадвартайгаас гадна Төрийн албаны шаардлагыг хангасан хүмүүс мэр сэр бий. Харин тэднээс биш төрийн үйлчилгээний байгууллагын даргыг сонгосон нь иргэдийн анхаарлыг илүүтэй татаж байгаа. Төрийн алба төрлийн алба болж буйн илрэл нь энэ удаагийн томилгоо гэдгийг захын хүн хэлнэ. Ямартай ч “Эрдэнэтийн соёл” эзэнтэй  боллоо. Харин “Эрдэнэтийн соёл”-ын хэмжүүр ямар байх, номын санчийн хэмжээнд харагдах эсэх нь цаг хугацаанаас хамаарах нь ээ.