УИХ-ын чуулганы нэгдсэн хуралдаанаар Хөрөнгө оруулалтын тухай хуульд өөрчлөлт оруулах хуулийн төслийг хэлэлцэж байна. Хуулийн төсөлтэй холбогдуулан УИХ-ын гишүүд үг хэлж, асуулт асууж, хариулт авч байна.

УИХ-ын гишүүн Н.Алтанхуяг: Гадаадын хөрөнгө оруулалтын 100 мянган ам.долларын босгыг 50 мянган болгохоор маргаашнаас хөрөнгө оруулалт орж ирнэ гэж горьдоод хэрэггүй. Ямар ч логик, анализгүй байна. МАН-ын нөхөд та нар минь сайн судал аа.

Энэ хээл хахуул, авлигаа болиулаа, чадахгүй бол багасгаа. Тэр Ерөнхийлөгчийнхөө ярьсан Байгалийн баялагтаа эзэн болно гэсэн дэмий яриаг ажил болгоо. Одоо тэрийгээ мартчихаад нэг тэрбум мод тарина гээд явж байна. Ийм эргүү солиотой улсад ямар амьтан хөрөнгө оруулахав дээ. Намайг хөрөнгө оруулсны дараа миний хөрөнгийг мод руу оруулна гэж бодно.

Дээрэм хулгайгаа болио, хуульгүй улс болсон байна. Хүний эрх, эрх чөлөөг хүндэл ээ. Иргэнээ хүндэлж чаддаггүй улсад ямар амьтан хөрөнгө оруулахав дээ.

Дээр нь юунд гадаадын хөрөнгө оруулалт оруулахаа ярих ёстой. Эхлээд монголчуудаа дэмжээч ээ. Өөрийнхөө хэдийг алгасаад өрөөлийг дэмжинэ, гаднаас доллар ороод ирвэл болно гээд байх юм гэсэн байр суурийг илэрхийллээ.

Мөн тэрбээр эрх баригчдыг улс орны асуудал руу орж, ажиллахыг санууллаа. Хайран улс маань яйран болж, нүдэн дээр унаж байна. Хаана байна, хүчээ нэгтгээд алаад өгнө гэдэг чинь хэмээн МАН-аас хариуцлага нэхлээ.

Эх сурвалж: shuud.mn

Б.Хэрлэн